KOSOVË– Sot Aeroporti Ndërkombëtar i Prishtinës u zgjua nën hijen e kërcënimeve për vënien e një bombe në ambientet e aeroportit. Autoritetet reaguan menjëherë duke evakuuar të gjithë personelin dhe pasagjerët. Në një deklaratë të bërë më herët zëvendësja e Aeroportit të Prishtinës “Adem Jashari” tha se janë marrë të gjitha masat për sigurinë e pasagjerëve dhe stafit aeroportual.
Ndërkohë në një deklaratë të bërë për mediat Policia e Kosovës sqaron se pas kontrollove të kryera rezultoi se kishim të bënim me një alarm fals dhe gjithçka ishte në kuadrin e një “kërcënimi të hapur” që bëhet ndaj rendit dhe sigurisë në Kosovë,
“Pas realizimit të kontrollit në objekte dhe hapësira të Aeroportit Ndërkombëtar “Adem Jashari” në Prishtinë, ka rezultuar se nuk ka ndonjë mjet shpërthyes, dhe se kanosja me mjete shpërthyese ka qenë një alarm i rremë me qëllime të caktuara. Pas përfundimit të kontrollit dhe punëve nga institucionet relevante, funksionimi dhe qarkullimi në aeroport i është kthyer normalitetit, andaj i falënderojmë qytetarët për mirëkuptimin dhe bashkëpunimin e treguar me institucionet e Republikës së Kosovës.”, njofton Policia e Kosovës.
Kujtojmë që kjo vjen pas tensioneve disa javore në veri të Kosovës ku serbët kanë bllokuar rrugët dhe vijojnë përplasjen me Policinë dhe KFOR-in.
