Albin Kurti: Janë 9 barrikada në veri të Kosovës, presim heqjen e tyre brenda ditës
Dy pikat kufitare në veri të Kosovës mbeten ende të bllokuara pas tensionimit të situatës në orët e pasdites së të dielës. Në një konferencë shtypi, kryeministri Albin Kurti tha se në veri të lumit Ibër janë 9 barrikada, të cilat pret të hiqen brenda ditës, në mënyrë që të rikthehet liria e lëvizjes. Kurti tha se qeveria e Kosovës ka marrë të gjitha masat për zbatimin e ligjit për të gjithë qytetarët.
Pikat kufitare Jarinjë dhe Bërnjak ende mbeten të mbyllura, sepse janë të mbyllura rrugët që të çojnë atje. Në të gjitha pikat e tjera lëshohet dokumenti për qytetarët serbë. Janë pajisur 1500 qytetarë serbë deri tani, me procedura që nuk zgjasin më shumë se dy sekonda.
Në veri të Ibrit janë gjithsej 9 barrikada në veri të Ibrit. Të gjitha masat që kemi marrë janë për ligjshmëri dhe rend demokratik. Asnjë masë nuk merret bazuar në identitetin etnik. Masat duhet të jenë në përputhje me ligjin. Dhuna nuk tolerohet, dhunuesit dënohen me forcën e ligjit.
Kurti falënderoi partnerët ndërkombëtarë për rolin e tyre në çtensionimin e situatës.
Gjatë ditës së djeshme kam qenë në kontakt me partnerët ndërkombëtarë. Çmoj përkushtimin e ambasadorit amerikan, qeveria e Kosovës do të vijojë me fushatën e informimit të të gjithë qytetarëve.
Ndërsa u bëri thirrje mediave të përdorin si të vetmin burim të sigurt informacioni institucionet e Kosovës.
Njoftimet që vijnë nga media të Beogradit dhe Moskës të mos i përhapim. Shpreh mirënjohjen për policinë e Kosovës. Angazhimi i tyre është siguria jonë.
