Analisti Arjan Curri, i ftuar në “Top Story”, komentoi një nga çështjet më të rëndësishme që SPAK ka aktualisht në dorë, si hetimin për ish-zëvendëskryeministrin Arben Ahmetaj.
Në fund të emisionit, ai zbuloi se një biznesmen i kishte shkruar duke i kërkuar llogari se pse ia përmendi emrin, duke i bërë në këtë një formë presioni.
Sipas analistit të gjitha dyshimet të çojnë vetëm te një person:Sokol Meqemeja.
Curri tha në “Top Story” të Grida Dumës se në dijeninë e tij edhe Arben Ahmetaj nuk ndodhet në Angli, por në një shtet tjetër dhe se një prej biznesmenëve që akuzohet se i ka dhënë Ahmetajt 140 mijë euro përmes shitjes fiktive të një apartamenti me garazh, është Sokol Meqemeja. Një biznesmen ky jo i panjohur për publikun, për shkak të bëmave të tij, ndërsa Curri vuri në dukje se ka përfituar tendera edhe nga qeveria e Sali Berishës. Ja si shprehet Curri:
“Ahmetaj nuk është në Angli, këta biznesmenë kanë ikur të gjithë nga sytë këmbët. Kam një pikëpyetje, Ahmetaj ka qenë në shërbim të këtyre, apo këta biznesmenë kanë qenë në shërbim të Ahmetajt. Këta biznesmenë janë të njohur, Sokol Meqemeja përshembull ka marrë tendera dhe nga qeveria e Berishës”.
Arjan Curri shtoi më tej se Meqemeja, ndonëse ka emrin në SPAK, ka marrë nga qeveria dy fusha me vendburime gazi në Shqipëri. Një tjetër deklaratë e Currit:
“A është gjyq popullor që Sokol Meqemeja bashkë me bashkëshorten e tij përfiton koncesione nga gazi, te pulat? Nuk është gjyq popullor se këto janë fakte. Këto kanë dalë nga SPAK-u, në momentin që përmenden në SPAK ne kemi detyrë si media të hetojmë për ta”
Ndërsa gazetarja Anila Hoxha tha se SPAK ka hezituar për të zbuluar lidhjet e këtyre biznesmenëve me Ahmetajn.
Ja çfarë thuhet në dosjen e SPAK për Ahmetajn për biznesmenin Sokol Meqemeja:
Në dosjen 320 faqe të SPAK për Arben Ahmetajn, mes emrash politikanësh e biznesmenësh të ndryshëm, evidentohet veçmas nga Prokuroria e Posaçme një episod me protagonist biznesmenin Sokol Meqemeja, pronari i kompanisë “Frigo Food”, një prej bizneseve më të mëdha të mishit në vend.
Sokol Meqemeja akuzohet nga SPAK se i ka dhënë Arben Ahmetajt, përmes skemave të shitjeve fiktive të apartamenteve, 140 mijë euro. Prokuroria e Posaçme evidenton se kjo shumë ka shkuar për ish zv. kryeministrin si shpërblim për inceneratorin e Fierit, të cilin e kishte marrë përmes kompanisë Building Counstriction & Green Energy, ku ishte një prej krijuesve të saj.
Po si ia kaloi Meqemeja 140 mijë eurot Arben Ahmetajt? Skema është identike si në rastet e treguara edhe më parë, përmes personave të tretë.
“Sokol Meqemeja, i shoqërisë “Frigo Food Shpk” datë 05.05.2018, është miratuar dhënia e huasë për shtetasen Sonila Goxha në vlerën 140.000 Euro. Shtetësja Sonila Goxhaj rezulton të ketë dy fëmijë nga marrëdhënia që ka me shtetasin Sokol Meqemeja”, thuhet në dosjen e SPAK.
