TIRANË– Banka Europiane për Rindërtim dhe Zhvillim e angazhuar drejtpërdrejt në procedurën e parë të ankandeve për parqet eolike, që po zhvillon Shqipëria, ka nënvizuar se interesi për këtë procedurë është i lartë. Ekaterina Solovova, Drejtore e BERZH në Shqipëri tha për Monitor se ofertat përfundimtare do të bëhen këtë vit.
Ndërkohë teksa më herët u finalizuan garat për fotovolataikët në Karavasta e Spitallë dhe tashmë eolikët në tokë janë gjithmonë e më afër, një tjetër opsion ku BERZH do të asistojë qeverinë shqiptare është energjia eolike në det të hapur.
“Në këtë drejtim, Shqipëria është veçanërisht e pozicionuar mirë për të shkallëzuar zhvillimin e sektorit të energjisë së rinovueshme, duke pasur parasysh potencialin e saj të madh dhe të pashfrytëzuar për energjinë diellore dhe të erës. Kjo është arsyeja pse diversifikimi i burimeve të rinovueshme të energjisë është një nga prioritetet kryesore strategjike të BERZH në Shqipëri. Jam shumë krenare për punën tonë në këtë fushë.
Në vitin 2020 dhe 2021 ne ndihmuam Shqipërinë në kryerjen e ankandeve të para të suksesshme të energjisë diellore për kapacitet 240 MW, të cilat rezultuan në sigurimin e një tarife shumë konkurruese për Shqipërinë nga një operator ndërkombëtar me reputacion të burimeve të rinovueshme Voltalia. Në fillim të vitit 2022 ka nisur ndërtimi i centralit të parë diellor në Karavasta. Synimi tjetër është energjia e erës.
Ankandi që është duke u zhvilluar tashmë ka tërhequr një numër të mirë ofertuesish të qëndrueshëm. Mezi presim të shohim ofertat përfundimtare në këtë ankand këtë vit.. Për më tepër, ne po angazhohemi me qeverinë për të eksploruar potencialin e vendit për erën në det të hapur”, tha përfaqësuesja e BERZH. Burime pranë Ministrisë së Infrastrukturës dhe Energjisë thanë se procesi i ankandeve të erës po ecën mirë por duke respektuar procedurat e bankës dhe se fituesit me shumë gjasa do të shpallen në qershor të këtij viti.
Ankandi, 17 kompani morën pjesë
Në shtator të vitit të shkuar gjatë një dalje për mediat Ministrja e Infrastrukturës dhe Energjisë Belinda Balluku tha se të paktën 17 kompani shfaqën interes për t’u bërë pjesë e garës për ankandet e energjisë eolike. Nga ky total në fazën e dytë kaluan vetëm 6 kompani.
Të kualifikuar ishin: Total EREN, Verbund, Voltalia, Eksim Yatrin Holding, Ayan & Salillari, Guris & Morgan Energy. Në këtë fazë të dytë po shihen kapacitetet financiarë të kompanive për të përballuar zbatimin e projektit. Në vitin 2021 MIE çeli zyrtarisht ankandin për dhënien e kapaciteteve të para të impianteve eolike me marrëveshje. Ankandi u njoftua se do të kishte disa faza ku në fazën e parë që zgjati 12 muaj u vlerësuan argumentet për eksperiencën teknike, burimet financiare si dhe pozita ligjore e kompanive të interesuara.
Në fazën e dytë që nis tani do të bëhet vlerësimi i ofertave. Çmimi tavan për ofertat në ankandet e energjisë nga era është vendosur 75 euro/MË që do të thotë se oferta duhet të jetë më e ulët se kjo shifër./Monitor
