Në Parkun Kombëtar Banff në Alberta të Kanadasë një burrë dhe një grua gjetën vdekjen nga sulmi i një ariu.
Sipas CBC News thuhet se autoritetet e parkut për sulmin e ariut u njoftuan përmes pajisjeve GPS në orët e mbrëmjes.
Për shkak të kushteve të pafavorshme atmosferike, ekipet e shërbimit nuk kanë mundur të ndërhyjnë nga ajri dhe kanë mbërritur me vonesë në vendngjarje.
Me të mbërritur në zonë, disa orë pas sulmit, ekipet kanë gjetur trupat e çiftit, të cilët nuk i kanë mbijetuar sulmit.
Gjatë kontrollit, ekipet kanë hasur në një ari agresiv dhe e kanë vrarë kafshën në vend.
Autoritetet raportuan se vetëm 14 për qind e sulmeve të ariut kafe në mbarë botën rezultojnë me vdekje dhe theksuan se sulmet e tilla janë një “ngjarje e rrallë”.
Supozohet se arinjtë, të cilët po përgatiten për gjumin e dimrit, janë të uritur në këtë kohë të vitit.
