HIMARË– Gruaja, e cila ka dëshmuar para Prokurorëve kundër kandidatit të koalicionit “Bashkë Fitojmë” Fredi Bejleri se ky i fundit i ka ofruar para në këmbim të votës ka folur për mediat ku dhe ka dhënë detaje. Në dalje të Policisë së Vlorës ajo thotë se nuk është takuar vetë me Bejlerin por me një person tjetër që i ka kërkuar votën në emër të tij dhe kur kjo ka refuzuar i ka ofruar 200 mijë lekë të vjetra.
Gruaja: Ne erdhën na morën në orën 02:00, dhe na thanë që thjesht do vini për në Himarë. Na gënjyen na morën na çuan në Vlorë. Na morën këtu në pyetje si është muhabeti. Thamë që përpara ka ardhur dikush përpara 3-4 ditëve dhe ne ka kërkuar të votojmë për Belerin. I thamë që nuk jemi dakord dhe na premtuan 200 mijë lekë. Kaq është muhabeti.
Kandidati i koalicionit “Bashkë Fitojmë” Fredi Bejleri u arrrestua pak pas mesnatës në një lokal në zonën e Himarës. Zyrtarisht tashmë ai akuzohet për kurrupsion në zgjedhje të kryer në bashkëpunim. Sipas Prokurorisë Bejleri ka kryer shit-blerje të votës dhe është arrestuar në flagrancë. Arrestimi i tij ka sjellë reagime të shumta në politikën shqiptare duke e tensionuar akoma më shumë situatën para zgjedhjeve të 14 majit.
