ATHINË– Kryeministri i Greqisë Kiriakos Mitsotakis ka reaguar pas arrestimit të kandidatit të koalicionit “Bashkë Fitojmë” për bashkinë e Himarës Fredi Beleri për akuzën e korrupsionit aktiv në zgjedhje. Kreyeministri grek e quajti arrestimin e Belerit një ngjarje të shëmtuar dhe kërkoi lirimin e menjëhershëm të tij.
Kiriakos Mitsotakis: Dua të flas për një ngjarje jashtëzakonisht të shëmtuar që ndodhi ne Shqipëri, ku fatkeqësisht u arrestua kandidati për Kryetar Bashkie të Himarës dhe anëtari i Minoritetit Kombëtar grek, Fredi Beleri. Nga Lesbos, t’i dërgoj një mesazh vendit mik Shqipërisë: Zbatoni ligjin dhe mbroni të drejtat e pakicës greke! Nëse Shqipëria dëshiron të afrohet me Bashkimin Evropian, ajo ka detyrimin të sigurojë zgjedhje të lira dhe të ndershme dhe të lirojë menjëherë ata që ka burgosur, në mënyrë që ata të marrin pjesë në procesin zgjedhor.
Kandidati i koalicionit “Bashkë Fitojmë” Fredi Bejleri u arrrestua pak pas mesnatës në një lokal në zonën e Himarës. Zyrtarisht tashmë ai akuzohet për kurrupsion në zgjedhje të kryer në bashkëpunim. Sipas Prokurorisë Bejleri ka kryer shit-blerje të votës dhe është arrestuar në flagrancë. Arrestimi i tij ka sjellë reagime të shumta në politikën shqiptare duke e tensionuar akoma më shumë situatën para zgjedhjeve të 14 majit.
