BRUKSEL– Nesër në mesditë priten njoftimet e autoriteteve gjyqësore belge për rastin e financimit nga Katari, që po “pllakos” Parlamentin Europian, ndërsa nënkryetarja greke Eva Kaili, është në “ paraburgim të përkohshëm”.
Sipas burimeve nga Brukseli, nuk do të ketë konferencë për media, por do të dalë një komunikatë për këtë rast. Të njëjtat burime theksojnë se policia belge ka përdorur metoda moderne për të luftuar krimin e organizuar, duke përfshirë edhe përgjimin telefonik.
Mbrëmjen e së premtes, 9 dhjetor, autoritetet belge proceduan me sjelljen dhe arrestimin e zyrtarëve dhe eurodeputëve, mes të cilëve ishte edhe nënkryetarja e Kuvendit, Eva Kaili, në kuadër të një hetimi të madh për skandalin e korrupsionit dhe parave të marra nga persona nga Katari.
Edhe pse hetimi që i parapriu operacionit policor ishte rezultat prej muajsh, zhvillimet në këtë rast që ka tronditur Parlamentin Europian janë të stuhishme. Çështja e parë kishte të bënte me faktin nëse znj. Kaili ishte sjellë apo arrestuar nga autoritetet belge .Mediat belge u konfliktuan. Siç mësoi “Protothema” nga Brukseli, në këtë fazë të hetimit termi “arrest” nuk është ai i duhuri, pasi në Belgjikë procedura cilësohet si “arrest në pritje të dëshmisë së të dyshuarit”.
Vlen të theksohet se arrestimi i nënkryetares së Parlamentit Europian, Eva Kaili, e cila kaloi natën në paraburgim, u bë pas të paktën 16 operacioneve të synuara nga autoritetet belge, në kuadër të një hetimi për korrupsion dhe pastrim parash.
Për shkak të zhvillimeve të stuhishme, grupi politik i Socialistëve dhe Demokratëve, të cilit deri dje i përkiste zonja Kaili, kërkoi pezullimin e punës për çdo dosje dhe votë në Parlamentin Evropian në lidhje me shtetet e Gjirit, derisa autoritetet kompetente të sigurojnë informacione dhe sqarime. Në të njëjtën kohë dhe siç raporton nga Brukseli gazetari britanik Jack Parrock, autoritetet e Katarit po hetojnë ambasadorin e tyre në Bashkimin Evropian, Abdulazizi bin Ahmed Al Malki, për përfshirje të mundshme në rastin e financimit.
