“Arrëthyesi”, baleti emblematik i Krishtlindjes, me muzikën e pa përsëritshme të Çajkovskit që sjell festën dhe magjinë, vjen në skenën e Teatrit Kombëtar të Operës dhe Baletit, deri më 30 dhjetor në orën 19:00.
Kjo përrallë me fund të lumtur vjen në jetë falë solistëve dhe trupës së baletit që dhurojnë perfeksion në çdo hap nën një koreografi
tërësisht të re krijuar nga Edi Blloshmi, nxënësve të shkollës së baletit, korit femëror dhe korit të zërave të bardhë, orkestrës simfonike të TKOBAP-së dhe nën dirigjimin magjik të Sergio Alapont.
Këtë vit, jo vetëm janë shtuar netët e shfaqjes që nisën më 23 dhjetor, por janë pasuruar edhe kostumet e kësaj kryevepre të baletit botër. Për sa i përket kostumografisë përrallore të “Arrëthyesit”, ato janë dizanjuar me mjeshtëri nga kostumografja Edlira Qyshka dhe të realizuara nga mjeshtrat rrobaqepës Bujar Kajtazi, Benet Dushku dhe Jeta Meni.
Historia e “Arrëthyesi”, rrjedh nga tregimi “Arrëthyesi dhe Mbreti i minjve” i Ernst Theodor Amadeus Hoffmann dhe flet për një zonjushë me emrin Klara, e cila zvogëlohet sa një miush dhe Arrëthyesi i saj i dashur shkon në luftë së bashku me lodrat e tjera kundër miut të lig. Më vonë ai transformohet në një princ të bukur dhe ata shkojnë së bashku në mbretërinë e zanave floksheqer (Confiturembourg) për të mbretëruar përgjithnjë. Për herë të parë baleti me dy akte “Arrëthyesi” u vendos në skenë në dhjetor 1892 pranë teatrit “Mariinskij” të Shën Pjetërburgut në Rusi.
