Suksesi i pastër 0-3 në transfertë përballë Torinos, i kombinuar edhe me humbjen e Milan, i dhuroi Interit kreun e Serie A në kuotën e 22 pikëve. Simone Inzaghi dhe stafi i tij janë përpara një jave të vështirë pasi në mes futet edhe Champions League. Të martën, zikaltërit luajnë një pjesë të kualifikimit teksa presin Salzburg në “San Siro”, ndërsa më pas duhet të bëjnë llogaritë me Romën, sërish në “San Siro”.
Inzaghi është i detyruar të bëjë pak rotacion, por pyetja që shtrohet është se kujt do të kushtojë më shumë rëndësi. E sigurt është se ndaj Salzburg, ku luan një pjesë të kualifikimit, Inzaghi pritet të hedh në fushë formacionin e tij më të mirë, pritet të rikthehen në fushë Bastoni dhe Dumfries ndërsa dyshja e sulmit do të formohet nga Martinez dhe Thuram. Surpriza e vetme mund të jetë Frattesi në vend të Barella-s.
Ashtu edhe si ndaj Toronos, Inzaghi as që e merr në konsideratë Kristjan Asllanin, për të është gjithnjë një opsion emergjence. Inzaghi dhe tifozët zikaltër kanë një arsye të fortë për të buzëqeshur, po shijojnë një Lautaro Martinez në super formë. Ndaj Torinos, kapiteni shënoi golin e tij të 11 në Serie A këtë sezon duke kryesues listën e golashënuesve më të mirë.
