KRUJË– Detaje të reja janë zbardhur nga atentati mafioz në Larushk të Krujës në mesnatë ku mbeti i vrarë 29-vjeçari Ramazan Sino dhe u plagosën dy nipat tij të mitur, fëmijët e Gentian Bejtjes, i cili dyshohet të ketë qenë dhe “shënjestra“. Policia përmes një njoftimi të dytë bën me dije e janë shoqëruar tre persona në komisariat, si persona që kanë dijeni për atentatin. Po ashtu janë ushtruar kontrolle në banesat e tyre. Dy fëmijët e mitur 13 dhe 10 vjeç të cilët mbeten të plagosur ndodhen në spital nën kujdesin e bluzave të bardha.
NJOFTIMI I POLICISË:
Krujë/Informacion shtesë. Në lidhje me informacionin paraprak të dhënë mbrëmë, për ngjarjen e ndodhur në oborrin e banesës së shtetasit G. B., ju bëjmë me dije se: Ka ndërruar jetë si pasojë e plagëve të marra shtetasi R. S., 29 vjeç, si dhe janë plagosur dhe ndodhen në spital, nën kujdesin e mjekëve, dy të mitur të moshës 13 dhe 10 vjeç, (nipat e shtetasit R. S). Me qëllim identifikimin dhe kapjen e autorit/ëve të dyshuar, shërbimet e Policisë kanë ushtruar 3 kontrolle në 3 banesa si dhe kanë shoqëruar 3 persona që mund të kenë dijeni për ngjarjen. Në përfundim të veprimeve hetimore në lidhje me ngjarjen, do të ketë një njoftim për shtyp në vijim.
