TIRANË– Gjykata e Tiranës ka lënë në burg këtë të hënë Valter Bamin. Togat e zeza nuk kanë marrë parasysh pretendimet e palës mbrojtëse duke lënë në burg Bamin gjatë hetimeve. Ndërkohë avokati i tij pas daljes nga Gjykata ka deklaruar se po veprohet në mënyrë arbitrare dhe se Gjykata po i “nënshtrohet” presionit publik.
Avokati: Aparati telefonik i klientit tim ishte i ndezur, janë aty pamjet kur ka ndodhur ngjarja. Ai ishte në banesë. Gjykata ndodhet në një pozicion shumë të dobët, vepron në mënyrë arbitrare nga opinioni dhe presioni. Këto pengojnë dhe lëvizjet, argumenti është se në lidhje me faktin se ky person ka qenë i dënuar, ai ka qene i dënuar për një armë relike. Klienti im shpjegoi se në kohën kur ka ndodhur ngjarja ka qenë në shtëpi.
Bami u arrestua për armëmbajtje pa leje por sipas ekspertëve në duart e tij u gjetën gjurmë baruti që shton dyshimet e përfshirjes së tij në atentat. Deri më tani Valter Bami i ka mohuar akuzat dhe ka deklaruar se gjurmët e barutit mund të kenë ngelur nga çiftja që ia ka me leje me të cilën ka bërë qitje së fundmi. Të njëjtin qëndrim ka pasur dhe avokati mbrojtjes i tij. Deri më tani Policia dhe Prokuroria nuk kanë asnjë provë konkrete që mund ta mbajë Bamin në burg ndërkohë që atentati mbetet ende i pazbardhur pavarësisht se ka pasur dhjetëra të shoqëruar në Polici.
