TIRANË– Gjykata e Posaçme Kundër Korrupsionit dhe Krimit të Organizuar (GJKKO) ka lënë në burg pesë të akuzuarit për atentatin e dështuar ndaj ish-prokurorit Arjan Ndoja, atentat ku mbeti i vrarë shoferi i tij Andi Maloku dhe u plagos “Rrumi i Shijakut”. Të pestë, Bashkim Haxhia, Marsel Deçka, Endrit Sinani, Genti alias Kili Ndërjaku dhe Julian Pjetri akuzohen për organizimin dhe pjesëmarrjen aktive në atentatin ndaj prokurorit Arjan Ndoja.
Në prangat e policisë kanë rënë Bashkim Haxhija, Marsel Decka, Endrit Sinani, Genti Ndërjaku alias Kili, ky i fundit u arrestua në vilën e Ramazan Rrahjës në Fushë Krujë. Ndërjaku dhe Juljan Pjetri kanë konsumuar elementët e veprave penale të “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal” dhe “Kryerja e veprave penale nga grupi i strukturuar kriminal”, të parashikuar nga nenet 80, 333/a/2 dhe 334 të Kodit Penal, në dëm të shtetasve A.N dhe A.L, G.M dhe A.M, sipas episodeve respektive (episod i konsumuar pas ngjarjes së datës 01.11.2019). Në kërkim është shpallur Ramazan Rraja, Plarent Dervishaj dhe Julian Meçaj.
