Ngjarja e rëndë që ndodhi në Dobraç të Shkodrës, ku Hamza Lici dhe Arlind Bushati u ekzekutuan, duket se është rezultat i një atentati të mirëorganizuara.
Sipas burimeve, katër autorë dyshohet se kanë marrë pjesë në këtë krim, me dy qitës që kanë përdorur armë të tipit kallashnikov për të goditur mjetin e viktimave. Një nga personat e përfshirë ka qenë shoferi, ndërsa një i katërt dyshohet se ka ndihmuar autorët të largohen pas krimit dhe djegies së makinës tek ish-reparti ushtarak në fshatin Golem të njësisë Rrethina, rreth 5 minuta nga vendi ku ndodhi masakra.
E gjithë ngjarja sipas burimeve nga grupi hetimor dyshohet të ketë zgjatur vetëm 70 sekonda dhe në një distancë prej 150 metrash. Ndërkohë që nga breshëria e plumbave, makina me targa kroate ku udhëtonin Lici dhe Bushati ka humbur kontrollin dhe është përplasur me motorin ku udhëtonin Bashkim dhe Flutura Basha, burrë e grua. Flutura 56-vjeçare ka humbur jetën në vendngjarje, ndërsa bashkëshorti i saj ndodhet në gjendje të rëndë në spital.
Vlen të thuhet se nga kontrolli i ushtruar në automjetin që udhëtonin shtetasit Hamza Lici dhe Arlind Bushati janë gjetur 3 armë zjarri (pistoleta). Kjo ngre dyshimet se dy viktimat i ruheshin ndonjë atentati të mundshëm pasi pak javë më parë, Bushati kishte denoncuar në polici një kërcënim me armë që kishte marrë. Ndërkohë shërbimet e Policisë gjatë kontrollit të zonës për kapjen e autorëve, në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike.
