TIRANË– Kryetari i grupit të Partisë Socialiste Taulant Balla deklaroi këtë të premte se PS nuk do të jetë pjesë aktive e përzgjedhjes së kandidaturave për Avokatin e Popullit duke pohuar kështu se PD tashmë do të jetë ‘jashtë’ këtij procesi. Para gazetarëve Balla la të kuptohet se zgjedhja do të bëhet pas zgjedhjeve vendore të 14 majit, pasi Kuvendi do të jetë më i tërhequr në veprimtari gjatë fushatës për shkak të angazhimeve elektorale të deputetëve.
Pyetje: Avokati i Popullit, a do ti zgjidhni ju kandidatët apo do ia lini opozitës?
Taulant Balla: Ka një, disa rregulla që askush nuk del dot mbi to, ligji dhe procedura parlamentare është e qartë. Jemi në një fazë ku 15 kandidatura kanë hyrë në proces. Do të zgjedhim një prej tyre ose nëse nuk ka konsensus do të hapet një proces i ri. Në këtë moment nuk zgjedh dot një emër jashtë këtyre të 15-ëve. Kuvendi emëron dhe shumica nuk do të marrë rolin e mbështetësit të pakushtëzuar të emrit që do të sjellë opozita, do të jemi pjesë e zgjedhjes. është turp për klasën politike dhe Kuvendit që nuk e kemi zgjedhur dot ende një Avokat Populli, jashtë politike dhe avokatë të çështjeve të caktuara.
Pyetje: Kur do e zgjidhni Avokatin e Popullit, para apo pas zgjedhjeve?
Taulant Balla: Dje në Kuvend, nënkryetarja bëri një njoftim për procedurën zgjedhore. Ajo iu referua traditës parlamentare sesi funksionon Kuvendi gjatë procesit zgjedhor vendor. Në rastin e zgjedhjeve të përgjithshme, Kuvendi mbyll punimet. Dje në Konferencë të kryetarëve e ngritëm si shqetësim, që Kuvendi të harmonizohet në axhendë me angazhimin elektoral. Deputetët do të jenë pranë qytetarëve në zonat e tyre, do të kemi seancë, jo çdo javë por ngadalësim të punës që të gjitha ditët të kompesohen pas datës 14 maj.
Por nëse për Avokatin e Popullit nuk bie dakord me opozitën duket se do të bashkëpunojnë për ligjin e dosjeve. Kreu i grupit të PS bëri të ditur se për këtë çështje do të ketë një bashkëpunimim me deputetët që mbështesin Enkelejd ALIbeajn në PD.
Taulant Balla: Kush ka qenë bashkëpunëtor i Sigurimit të Shtetit, e humb mandatin e deputetit. Propozimi i opozitës, që t’ju them të drejtën bën sens, është një mënyrë tjetër, nuk përdoret ligji i Dekriminalizimit, por një ligj i posaçëm. Ndërhyrjet përmes autoritetit që ka jo vetëm fuqinë verifikuese, por merr vendimin përfundimtar. Ajo që na duhet pa humbur kohë është që t’i bëjmë bashkë dy propozimet që të shkojmë te zgjedhja konkrete, ligjore. Propozimi ynë është i hapur që ta diskutojmë me grupin e PD. Duhet t’i hapim rrugë. Besoj që do ta votojmë. Ne duam që të shkojmë te propozimi ynë, por ka dhe një propozim dhe opozita. Jemi të hapur të diskutojmë çdo formë, me rëndësi është rezultatit përfundimtar.
