TIRANË– Juristi Alket Jaupi ka prezantuar këtë të mërkurë kandidaturën e tij për Avokatin e Popullit. Gjatë fjalës ë tij para Komisionit të Ligjeve Jaupi tha se nëse zgjedihet në krye të institucionit do ti ushtrojë presion të vazhdueshëm qeverisë sa i përket minimumit jetik. Po ashtu ai tha se do të zhvillojë takime me qytetarë në të gjithë vendin çdo muaj për të prekur nga afër problematikat me të cilat ata përballen çdo ditë. Sipas tij ai e ka gjetur “diagnozën” nga e cila vuan institucioni dhe për këtë ai ka dhe “kurën”.
Pyetje: Qeveria nuk e ka miratuar minimumin jetik, edhe pse Avokati i Popullit ka miratuar raporte të vazhdueshme. Cili do të jetë vendimi juaj për presionin që do t’i ushtroni qeverisë për miratimin e minimumit jetik?
Alket Jaupi: Unë institucionin e Avokatit të Popullit e shikoj të hapur për qytetarët. Unë e di potencialin, burimet njerëzore që ka ky institucion. Jam konfident që është i realizueshëm, e kam fjalë për mbledhje të hapura. Ky është roli i institucionit, të jetë bashkëpunues, ndërveprues. Unë konceptoj që edhe zyrat rajonale kanë një rëndësi të veçantë. Qytetarët duhet ta ndjejnë që ky institucion është në shërbim të tyre. Një herë në muaj do të ketë takime të hapura. Përsa i përket minimumit jetik, AP e ka sjellë shumë herë në vëmendje. Do të bëjmë presion pozitiv të vazhdueshëm me të gjitha mjetet që kemi në dispozicion. Jam diplomuar si jurist në vitin 1995 në fakultetin e drejtësisë në Universitetin e Tiranës. Kam 25 vite eksperiencë në fushën e të drejtave të njeriut. Një pjesë e mirë, 21 vite, ka të bëjë me punësimin tim pranë Avokatit të Popullit, si këshilltar, Sekretar i Përgjithshëm, ndihmëskomisioner dhe shumë detyra të tjera me mjaft rëndësi. Është një eksperiencë e gjatë, e cila sikurse është paraqitur në platformën time, përsa i përket aspektit të titujve, unë jam doktor shekencave. E kam fituar këtë titull në vitin 2018 me një program për të drejtat e njeriut. E shfrytëzova, dhashë një kontribut dhe fitova gradën. Aktualisht jam këshilltar i Presidentit të Republikës. Mbuloj të gjithë aspektin ligjor. Kjo eksperiencë më ka dhënë mundësi që përveç njohurive të thella, të kem mundësi të shoh dhe shumë gjëra nga jashtë. Kam kryer një sërë punimesh shkencore për çështje që lidhen me funksionimin e Avokatit të Popullit. Kandidova në vitin 2021 për në Gjykatë ne Posaçem, u rendita me pikë të larta sipas KED. Cilat janë arsyet pse unë kandidoj? Besoj se është një institucion që ka një kontribut të rëndësishëm në shoqërinë shqiptare. Kam pasion që nuk do të më mungojë. Ky është një institucion që është në fazën e konsolidimit. Do të ndihmoj që ky institucion të kthehet me imazh të konsoliduar për faktin që mbron të drejtat e njeriut. Kandidoj sepse e njoh thellësisht këtë institucion, i njoh diagnozën dhe jam i gatshëm t’i jap edhe kurimin. AP ka arritur disa standarte, por zhvillimi i standarteve të reja është një proces që duhet të ndodhë.
