Kryetari i Grupit Parlamentar të Partisë Socialiste, Taulant Balla, tha se Kuvendi i ri do të këtë organizim me 11 komisione parlamentare dhe ky propozim është depozituar tashmë.
Ai theksoi se brenda kësaj jave duhet të përmbyllet plotësimi i komisioneve.
Gjatë diskutimit me median, Balla u shpreh se pjesë e ndryshimeve të rregullores do jetë dhe shtimi i një Komisioni Parlamentar, i cili do ketë në fokus Diasporën.
“Kemi marrë iniciativën për ta propozuar, po ashtu kemi ftuar edhe opozitën siç është fryma e rregullores. Kryetari i Kuvendit i kërkoi grupeve parlamentare të propozojnë anëtarët e këshillit për rregulloren, Këshillit për Legjislacionin, të marrin jetë institucionet ku mund të takohesh me opozitën. Nuk mendoj se mund të konsultoheshim me opozitën para se kuvendi të takohej. Në seancën e tretë duhet të ngremë institucionet dhe për pasojë të marrim edhe vendimet. Kuvendi i Shqipërisë duhet të ketë një organizim të ri, të reflektojnë edhe momentin historik që kemi, nevojën për t’iu përqasur marrëveshjes për anëtarësimin në BE, që më në fund kemi një komision parlamentar për diasporën.. Kini parasysh që jemi në një situatë, e cila nuk është shumë e parashikuar nga rregullorja. Na duhet që brenda kësaj jave të shqyrtohen dekretet për qeverinë, përbërjen dhe programin qeverisës. Na duhet dhe të kemi gati konferencën e kryetarëve për të diskutuar kohën e debateve. Është domosdoshmëri, që të kalojmë këtë etapë nesër që brenda kësaj jave ti përmbyllim edhe proceset e tjera”, tha ai.
Partia Socialiste ka propozuar drejtuesit për 7 komisionet parlamentare, ndërsa katër prej tyre i takojnë opozitës, por kjo e fundit nuk i ka propozuar ende emrat e saj.
Strukturimi i 11 Komisioneve Parlamentare
1. Komisioni i Ekonomisë punësimit dhe financave – PS. – Milva Ekonomi
2. Komisioni për Çështjet ligjore dhe Administratën Publike – PS. – Ulsi Manja
3. Komisioni për Çështjet e Brendshme dhe Mbrojtjen – PS – Bledar Çuçi
4. Komisioni për Edukimin, Shkencës dhe Sportit – PD
5. Komisioni për Shëndetësinë dhe Mbrojtjen Sociale – PD
6. Komisioni për Burimet Natyrore, Infrastrukturën dhe Zhvillimin e Vazhdueshëm – PS- Anila Denaj
7.Komisioni për të Drejtat e Njeriut dhe Mjetet e Informimit Publik- PD
8. Komisioni për bujqësinë, ushqimin dhe zhvillimin rural – PS – Blendi Klosi
9. Komisioni për Kulturën, Turizmin dhe Diasporën – PD
10. Komisioni për Evropën dhe Punët e Jashtme – PS. – Igli Hasani
11- Komisioni për Nismat Qytetare, bashkëpunimin dhe nismat institucional- PS – Fatmir Xhafaj
Ndërkohë, Damian Gjinkuri do të drejtojë sërish Komisioni i Posaçëm për Reformën Zgjedhore, kurse Arbjan Maznikut Partia Socialiste i ka besuar Komisioni i Posaçëm për Reformën Territoriale
