Thesari i Shtetit ndau rreth 300 milionë euro për 10 kompani përgjatë vitit të kaluar, ku 13 për qind e kësaj shume shkoi për kompaninë Bankers Petroleum, që renditet e dyta në listën e kompanive me transfertat më të mëdha nga buxheti i shtetit.
Të dhënat e analizuara nga OpenData tregojnë se Bankers ka përfituar rreth 3.9 miliardë lekë transferta nga thesari, ose gati 40 milionë euro. Transferat janë kryesisht për rimbursim të TVSH-së, që shteti shqiptar ja mbulon në bazë të kontratës së nënshkruar me kompaninë.
Ajo që bie në sy është se në listën e 10 kompanive që kanë përfituar më shumë para nga buxheti i shtetit vetëm Bankers është në këtë listë si përfituese e rimbursimit të TVSh-së.
Nëntë të tjerat janë kompani që janë paguar për punë, apo shërbime që kanë përfituar përmes tenderave të dhënë nga qeveria.
Paratë janë depozituar në llogaritë e kompanisë Bankers para se Prokuroria e Fierit të regjistronte procedimin penal me akuzën e ngritjes së një skeme mashtrimi me investimet dhe të ardhurat, për të shmangur detyrimet tatimore.
Sipas akuzës së prokurorisë, kompania ka eksportuar dhe shitur rreth 5 miliardë euro, ndërsa ka deklaruar humbje rreth 110 milionë euro përgjatë gjithë periudhës.
Bankers dyshohet se ka “rritur në mënyrë fiktive shpenzimet e saj, me qëllim që në bilancin vjetor të rezultojë me humbje jo vetëm për të mos paguar tatim-fitim, por edhe për të përfituar rimbursim TVSH-je.
40 milionë eurot që buxheti i shtetit shqiptar ka rimbursuar TVSH Bankers përgjatë vitit të kaluar janë detyrime të prapambetura dhe sipas kompanisë, shteti shqiptar i detyrohet edhe 36 milionë euro të tjera rimbursim TVSh-je.
Kjo nuk është hera e parë që autoritetet e vendit hetojnë kompaninë Bankers Petroleum.
Një hetim i Agjencisë Kombëtare të Burimeve Natyrore në vitin 2012, zbuloi se një skemë të dyshimtë, që kompania kishte ngritur në bashkëpunim me palë të treta.
Sipas kësaj skeme, Bankers nënkontraktonte fiktivisht kompani të treta, duke i deklaruar në bilance si shpenzime.
Në të vërtetë, shpenzimet ishin vetëm në letër, kompanitë e nënkontraktuara në kryenin asnjë punë.
Çështja përfundoi në arbitrazh dhe vitin e kaluar qeveria shqiptare njoftoi se kishte fituar padinë e ngritur nga ana e kompanisë. / Vox news
Pse dosjen duhet t’a marrë Altin Dumani?
Gjatë dy dekadave, të ardhurat e Bankers nga nxjerrja e naftës janë rreth 5.5 miliardë euro. Kompania ka paguar zero taksa, pasi çdo vit manipulon dhe fryn shpenzimet. Jo vetëm kaq. Por, Bankers kërkon edhe dhjetëra milionë euro rimbursim TVSH bazuar në faturat fiktive për fryrjen e shpenzimeve me Idajet Ismailjn, Behar Çukajn, Baki Sinajn, Artur Çobon etj., që të gjithë të lirë dhe duke shijuar dhjetëra milionë euro të vjedhura.
Elion Mustafaj është prokurori i dosjes së vjedhjes 20-vjeçare nga Bankres, fillimisht nën drejtimin e kanadezëve dhe më pas kinezëve. Integriteti i prokurorit Mustafaj nuk vihet në dyshim. Edhe me hetimin e deritanishëm, ndonëse jo shtetues, emri i prokurorit Mustafaj ka hyrë në histori, pasi ka trazuar dhe ka hequr perden mbi vjedhjen më të madhe në historinë e shtetit shqiptar.
Por ka disa arsye dhe rrethana se pse dosjen duhet t’a marrë SPAK, jo për të vënë në dyshim vullnetin dhe forcën e prokurorit Elion Mustafaj.
Së pari, kemi të bëjmë me një grup të strukturuar kriminal, të organizuar, me një hieraki dhe me role të posaçme veprimi. Dhe grupi strukturuar kriminal është në kompetencë të SPAK-ut.
Së dyti, kemi implikim në nivele të larta, ministrash, të cilët janë në kompetencë të SPAK-ut. Për shembull, është implikuar Anila Denaj kur ishte ministre Financash, e cila vendosi të pezullonte ekzekutimin e gjobës 100 milionë euro ndaj Bankers, gjobë e konfirmuar nga gjykatat e të gjitha niveleve, pasi kompania kishte deklaruar shpenzime fiktive për të evituar taksat.
Së treti, nëse do të ndiqet rruga e parave, të cilat kanë kaluar nga Bankers në llogaritë e një trusti kompanish, fijet e parave do të nxjerrin zbuluar ‘ustallarët’ në Tiranë si përfitues fundorë. Nuk kemi të bëjmë vetëm me skemë mashtrimi dhe pastrim parash, por me një histori të frikshme dhe të konsoliduar korrupsioni.
Së katërti, edhe nëse prokurori Mustafaj do t’u bëjë ballë të gjitha ndërhyrjeve, grupi kriminal i korrupsionit, duke pasur një fuqi vullkanike financiare, njohjesh dhe ndikimi, do të korruptojë në vijim gjyqtarët e Fierit pasi vëmendja ndaj skandalit të bie./ Prapaskena
