TIRANË- Edhe këtë të dielë banorët e Bërxullës që preken nga projekti Thumanë-Kashar kanë dalë në protestë duke kërkuar që mos u prishen banesat, ose të bëhet një marrëveshje, ku këta të fundit të dëmshpërblehen me vlerën e tregut.
Një ndër banorët, i revoltuar është shprehur se kryeministri Rama e ka bërë Shqipërine armik edhe me Amerikën, duke shtuar më tej se do të presin për një zgjidhje, deri në një moment ku do ndërmarrin vetë veprime të tjera.
“Na bëri armik kreu i qeverisë edhe me Amerikën. Ne presim, por durimi do të soset dhe ne nuk do të presim. Njeriu njëherë lind dhe njëherë vdes. Prona është e shenjtë, po protestojmë mbi 4 muaj e gjysmë. Ne si cdo të dielë jemi në protestë, por sot solidarizohemi me popullin turk dhe sirian. Çfarë ka ikur nuk kthehet më. Dyert tona janë të hapura. Ndaj ndajmë dhimbjen dhe i bashkohemi këtij populli që vuan. Por ajo dhimbje ishte nga fatkeqësia natyrore. Këtu në Shqipëri fatkeqësitë natyrore po i shkaktojnë politikanët. I bëjmë thirrje që mos shkaktojnë fatkeqësi. Ne nuk tërhiqemi sepse pronat nuk i kemi të vjedhura siç i keni ju. Boll keni vjedhur. Nuk jeni të ngopur me këto fshatrat turistik? Jo të vidhni pronën e fshatit Bërxullë për të bërë vila për shoqet dhe të dashurat e politikanë, siç po dalin një nga një”
