TIRANË– Emisioni “Fol” i gazetarit Erjon Skëndaj ka trajtuar sot problematikën e banorëve të fshatit Bërxull, që kundërshtojnë rrugën Thumanë-Kashar. Kryeplaku i fshatit Bërxull tha se banorët kërkojnë dëmshpërblim sipas çmimeve të tregut, certifikim të pronës dhe të tregohet se si do zhvillohet projekti. Në të kundërt ai paralajmëron se firma “Gener 2” nuk do ta ndërtojë këtë rrugë, pasi ajo do “lahet me gjak”.
“Kemi 76 ditë që protestojmë mbi këtë koncesion. Paralel me këtë rrugë është rruga e aeroportit dhe zhvillohet hekurudha. Ne jemi në këtë protestë sepse kjo firmë që e ka marrë me koncesion, nuk jep asnjë lloj shpjegimi si do zhvillohet kjo rrugë! Është pa plan, pa leje ndërtimi, pa vendim shpronësimi. Bërxullit i merren drejtpërdrejt 30 ha tokë. I dëmtohen 20 banesa, hidhen në tokë. Mbi 90 për qind e banesave janë me hipotekë, një pjesë janë në proces legalizimi. Të gjithë banorët janë autoktonë, në pronat e tyre, 300-vjeçarë. Rruga ka edhe pjesën e padukshme që do ta godasë për së dyti këtë rrugë. Janë linjat e tensionit të lartë, që do dalin jashtë shtratit të rrugës. Preken 50 banesa të tjera, shkojnë në 70 vetëm në Bërxullë. Fshati ka rreth 1000 shtëpi, nga të cilat 100 ikin. Edhe të tjerët do preken, nuk e dimë ku do ketë nënkalime në autostradë. Tokat përballë Epokës janë blerë nga oligarkë. Po të shkosh në zyrat e Hipotekës i gjen emrat. Komplet projekti i parë është devijuar, nuk prekte asnjë banesë. Mund të prekte 12-13 ha tokë. Është dyfishuar sipërfaqja e tokës dhe 20 banesa të drejtpërdrejta. Pse nuk paraqiten këtu për të na i prezantuar, bashkia, Prefektura, Ministria e Infrastrukturës. Ia kanë dhënë këtë projekt pa garë koncesionarit, që ka filluar aktivitetin nga dita e parë, ku ka pushtuar tokat në mënyrë të paligjshme. Kontrata është qesharake. Firma e ka dëmshpërblyer individin për fiq, kumbulla, hardhi, me 3 milionë lekë dhe i ka pushtuar tokën!”.
Kryeplaku i Bërxullit thotë se ministrja Balluku i takonte banorët kur ishte kandidate për deputete, ndërsa sot mbyll grilat e institucionit që të mos dëgjojë zërin e protestës.
“Asnjë komunikim me Ballukun. E kemit takuar kur ishte kandidate për deputete në 2017. U bë deputete, ministre. Ne na tha do u japim një lugë floriri si Enveri! Nga ajo ditë ministrja nuk denjon qoftë dhe për një minutë të marrë parasysh ankesën tonë. Edhe grilat e dritareve na i ka mbyllur. Deri sa ne të jemi gjallë firma ‘Gener 2’ nuk do ta ndërtojë këtë rrugë, sikur rruga të lahet me gjak! I kërkojmë vlerën e pronës sipas çmimit të tregut, që është 85 euro metri këtu, mbi 120 afër autostradës. Certifikimi i pronës dhe si do zhvillohet projekti. Po nuk u bënë këto të treja s’do ketë rrugë”.
Ndërsa banori Adem Dervishi u shpreh:
“Sa frikë kanë këta pushtetarët tanë ‘të nderuar’! Ne kemi një shtet të mafies, të tmerrshëm! Na ka marrë mushkërinë, ku do jetojmë ne?! Të vish ta devijosh për pesë prona”.
Një tjetër banore tha se “shteti na ka shitur te koncesionarët”.
“Jemi tre familje. Shtëpia ime është e para që preket. Më ka ardhur vetëm juristi i ‘Gener 2’ për të numëruar pemët. Unë s’kam pranuar. Nuk do lejoj njeri të hyj në pronën time. Me gjak do ta mbroj!”, u shpreh ajo. /MCN
