Dhjetëra banorë të Dibrës u mblodhën pranë vendit ku do të ndërtohet hidrocentrali i Skavicës. Banorët ripërsëritën thirrjet ndaj qeverisë që të heqë dorë nga projekti. Sipas banorëve, projekti shkakton dëme të mëdha, ndërsa thanë se nuk do të lejojnë ndërtimin e veprës hidrike në këtë zonë.
Banorë të Dibrës janë mbledhur në zonën e Reçit, zona fundore e krahinës së Dibrës e cila pritet të jetë një nga zonat më të prekura nga ndërtimi i hidrocentralit të Skavicës. Komuniteti dibran i bëri thirrje kryeministrit Edi Rama të heqë dorë nga Skavica, duke u shprehur se nuk do të ndalen nga mbrojtja e Dibrës.
Studiuesi Haki Përnezha, shprehet se dëmet nga Skavica do të jenë të mëdha duke shkatërruar trashëgiminë kulturore dhe natyrore. Banorët nga ana tjetër, të cilët panë nga afër punimet që po kryhen për studimin e terrenit ku do të ndërtohet diga, shprehen se qeveria është jo transparente për projektin. Ndërtimi i hidrocentralit të Skavicës pritet të përmbytë me ujë mijëra hektarë tokë bujqësore dhe 37 fshatra të Dibrës./SyriTv
