TIRANË– Banorët e Njësisë 4 në kryeqytet kanë anuluar deklaratën që do të mbanin deputetët demokratë në këtë njësi për të denoncuar punimet në rrugën ‘Xhon Belushi’.
Banorët janë shprehur të revoltuar pasi sipas tyre kjo nuk është një çështje politike por bëhet fjalë për problemet dhe hallet e tyre. Kështu Albana Vokshi dhe Gent Strazimiri u detyruan ta jepnin deklaratën para bashkisë.
“Ikni, lëreni bashkinë të na bëjë rrugën. Ta kishit bërë ju kur e kishit bashkinë”, janë shprehur banorët.
Ndërkohë gjatë fjalës së mbajtur para bashkisë Vokshi tha se Veliaj i kishte nxjerrë patronazhistët për t’i përzënë për të fshehur abuzimet.
Nuk e bën dot atje ku e kishim planifikuar për shkak të angazhimit të ushtrisë së patronazhistëve të Erion Veliajt, që i them t’i tërheqë urgjentisht. Çfarë nuk donte Erion Veliaj të shihnin qytetarët e Tiranës, vjedhjen skandaloze. Erion Veliaj është kapur në flagrancë, ndaj drejtësia duhej të kishte reaguar që në momentin kur kandidati i Bashkisë Tiranë, Belind Këlliçi e denoncoi dy ditë më parë“, tha Vokshi.
