Pas përplasjeve në seancën e Kuvendit, Gazment Bardhi dhe Lulzim Basha e kanë zhvendosur debatin në distancë mes tyre, në deklaratat që kanë bërë përpara gazetarëve. Çështja kryesore ishte akuza e ngritur nga Bardhi se Basha dhe familjarët e tij pas humbjes së zgjedhjeve të 2021, kanë porositur dy kate në një kullë luksoze në Tiranë.
Bardhi iu qëndroi akuzave, duke dhënë më tej dhe emrin e rezidencës ku Basha sipas tij ka blerë dy kate. Bëhet fjalë për ‘Lion Rezidencë’ e cila është e ndërtuar në hyrje të liqenit Artificial.
Përveç kësaj, Bardhi tha se Basha ka shkuar në garazhin e Ilir Shtufit, pronarit të kullës 64-katëshe që pritet të ndërtohet te 9-katëshet në Tiranë, dhe i ka kërkuar atij falje.
Për këtë arsye, kryetari i Partisë Demokratike, Lulzim Basha ka reaguar sërish, këtë herë në Facebook, në lidhje me akuzat e Bardhit.
Duke i cilësuar mashtrime, Basha shprehet se janë të njëjtët ata që dje i thoshin vrasës njëri-tjetrit.
“Sa për gënjeshtrat e fundit: Unë as nuk kam porositur kulla dhe as nuk kam marrë kate në asnjë kullë. Këto janë mashtrime të dëshpëruara, pjesë e lojës së pisët dhe të vjetër të baltosjes”, thotë Basha.
Sipas tij, “aleanca e kullave nuk e bën dot pis PD dhe zëdhënësin e ri të non gratës e pret i njëjti fat”.
Reagimi i Bashës:
Aleanca e kullave dhe e non gratave nuk do ta bëjë pis e as do ta mbajë peng Partinë Demokratike. Njerëzit e dinë mirë çfarë përfaqësojnë këta individë dhe interesave të kujt i shërbejnë. Janë të njëjtët që sot flirtojnë me atë të cilit dje i thoshin vrasës.
Sa për gënjeshtrat e fundit: Unë as nuk kam porositur kulla dhe as nuk kam marrë kate në asnjë kullë. Këto janë mashtrime të dëshpëruara, pjesë e lojës së pisët dhe të vjetër të baltosjes.
Ndërsa çështja McGonigal është kthyer në aktakuzën më të rëndë ndaj sulmeve të ulëta kundër meje prej Edi Ramës e Sali Berishë, si edhe prej kujtdo tjetër që po përdoret prej tyre. Se kush e shpëtoi Edi Ramën nga llogaridhënia për Kosovën, e pamë mirë në konferencën e djeshme të kryetarëve dhe në konsensusin për të ruajtur imazhin e Ramës.
Kaq në respekt të qytetarëve, sepse asgjë nuk pres nga ata që për hallet dhe karriget e tyre, duan të na shfokusojnë nga problemet e Shqipërisë dhe të shqiptarëve.
Ashtu si padrinoja non grata e humbi luftën e shpifjeve disa vjeçare, pasi koha e nxorri të vërtetën në dritë, edhe zëdhënësin e tij të radhës e pret i njëjti fat.
