Kryetari i PD, Lulzim Basha ka marrë sot mbështjen e CDU-së, partisë qeverisëse gjermane. Nga CDU-ja gjermane, Kuvendin Kombëtar të PD e përshëndeti Gunther Krichbaum, zëdhënës i çështjeve europiane të grupit parlamentar CDU/CSU në Bundestag.
Në mesazhin e tij, Kirchbaum thekson se PD ka qenë dhe mbetet një parti partnere e CDU.
Drejtuar delegatëve dhe anëtarëve të PD, Kirchbaum deklaron se punimet e sotme të Kuvendit Kombëtar dhe vendimet e marra nga delegatët, janë gur themeli i suksesit elektoral të Partisë Demokratike në zgjedhjet parlamentare të 2025-ës.
Duke komentuar krizën që ka përfshirë Partinë Demokratike prej dy vitesh, zyrtari i CDU-së Gunther Krichbaum thotë se në Gjermani janë ndjekur me shqetësim këto zhvillime.
Ai apelon për fuqizimin e PD dhe shndërrimin e saj në alternativë qeverisëse gjatë muajve në vijim, pasi siç kujton Krichbaum, zgjedhjet parlamentare nuk janë larg.
“Ju uroj ju i dashur Lulzim Basha dhe të gjithë bashkëpunëtorëve tuaj shumë suksese në këtë projekt të madh e të vështirë, por të domosdoshëm. Kudo që ne si CDU mund t’ju ofrojmë mbështetje, na njoftoni. Shqipëria ka një potencial të madh për shkak të popullit të saj. Në duam që Shqipëria më në fund të jetë në gjendje të përfitojë nga mundësitë e shtëpisë sonë të përbashkët europiane. Dhe pikërisht për këtë na duhet një Parti Demokratike e fuqishme dhe e reformuar”!”, thuhet në mesazhin e Gunther Krichbaum.
Mesazhi i plotë i Krichbaum:
“Përshëndes miqësisht të gjithë pjesëmarrësit në Kuvendin Kombëtar të Partisë Demokratike të Shqipërisë. Ky Kuvend Kombëtar është një mbledhje shumë e rëndësishme për të ardhmen e PD, për të ardhmen e Shqipërisë me qëllim anëtarësimin e saj në Bashkimin Europian si dhe për bashkëpunimin e ardhshëm me partnerët tuaj të CDU-së në Gjermani. Së pari, Partia Demokratike e Shqipërisë ka nevojë për lidership të fuqishëm dhe anëtarë shumë të motivuar, të udhëhequr dhe të përkushtuar ndaj vlerave europiane.
Në historinë e saj të re, Partisë Demokratike i është dashur të përballet me tendenca përçarëse të cilat ne po i ndjekim me shumë shqetësim, por forca dhe rëndësia krijohen vetëm me vendosmëri dhe unitet. Politikani kristian-demokrat Ervin Teofel u shpreh dikur kështu: “Së pari vendi, pastaj partia, pastaj individi”. Pra, ka të bëjë me shërbimin ndaj njerëzve dhe vendit dhe vetëm atyre. Kështu duhet të shohë veten dhe duhet të jetë PD, sepse Shqipëria ka tashmë mjaft parti të cilat nuk i shërbejnë vendit dhe popullit, por interesave personale të disa apo edhe të një individi të vetëm.
Por PD duhet të forcohet për të qeverisur sërish vendin. Ajo duhet të hapet ndaj forcave dhe sinergjive të reja në shoqëri, të bëhet tërheqëse për to, në mënyrë që individë të rinj të kenë mundësi të kontribuojnë. Në këtë kuadër, Partia Demokratike ka gjithashtu nevojë për një program reformash me karakter europian me të cilin mnund të garojë në zgjedhje dhe të shpalosë të qarta, të kuptueshme synimet e saj politike si parti e ardhshme qeverisëse. Lulzim Basha dhe ju të dashur miq të Partisë Demokratike, me angazhimin maksimal përmes këtij takimi dëshironi pikërisht nisjen dhe shtyrjen përpara të këtyre reformave. Në këtë Kuvend duhet të vendoset gur themeli i suksesit elektoral të Partisë Demokratike në vitin 2025, pasi zgjedhjet e ardhshme parlamentare nuk janë larg.
Së dyti, Bashkimi Europian është para së gjithash një bashkësi vlerash. Kështu 27 shtetet anëtare të saj ndajnë vlerat e paqes, lirisë, shtetit të së drejtës, demokracisë dhe solidaritetit. Shoqëritë e shteteve që duan të anëtarësohen në BE dëshirojnë t’ju bashkohen këtyre vlerave. Por jo më pak e rëndësishme, ato kërkojnë të shohin perspektiva, mirëqenie për veten dhe fëmijët e tyre. Për ta bërë të mundur këtë, qeveria shqiptare duhet t’ia dalë të tërheqë në vend kompani të huaja që krijojnë vende pune të sigurta dhe të mirëpaguara.
Megjithatë, Shqipëria mund të tërheqë investime të huaja vetëm nëse funksionon siç duhet shteti i së drejtës. Parim i cili me çdo kusht kërkon një luftë të vendosur kundër korrupsionit. Vetëm atëherë do të mund të krijohet një klimë e sigurt investimi e cila është veccanërisht e vlerësuar nga kompanitë gjermane. Prandaj Shqipëria ka nevojë për një parti të fuqishme që vepron sipas vlerave europiane e cila çon vendin në Bashkimin Europian, pra krijon shtetin ligjor, lufton në mënyrë të vazhdueshme korrupsionin dhe zhvillon ekonominë.
Në këtë mënyrë, veccanërisht të rinjve nuk do t’ju duhet të largohen nga vendi, por do të qëndrojnë këtu dhe angazhohen për ta zhvilluar atë. Të rinjtë duan një Parti që iu ofron perspektiva të reja. Pikërisht këtu ka shumë për të bërë sepse procesi i anëtarësimit në Bashkimin Europian nuk ka përparuar prej muajsh. Nuk e mohoj që në Shqipëri ka patur zhvillim vitet e fundit, p.sh procesi i verifikimit të gjyqtarëve dhe prokurorëve publikë ka shënuar progres të kënaqshëm dhe Prokuroria Anti-korrupsion SPAK, është kthyer tashmë në një histori të vërtetë suksesi. Por, fakt është gjithashtu që Reforma Zgjedhore nuk ka përfunduar, ligji për median nuk është ndryshuar sipar rekomandimeve të Komisionit të Venecias, reforma administrative është e pamjaftueshme dhe mbi të gjitha lufta kundër korrupsionit dhe krimit të organizuar duhet të kryhet në mënyrë shumë më të vendosur.
Duke qenë se zgjedhjet e ardhshme Parlamentare janë planifikuar për t’u mbajtur në vitin 2025, nuk ka mbetur shumë kohë për të bërë të qarta synimet politike për të ardhmen e Shqipërisë Europiane dhe për t’u paraqitur para qytetarëve si një alternativë reale qeverisëse. Nëse i besoj një partie për të përmbushur këto kërkesa, atëherë kjo parti është Partia Demokratike, ja, jeni ju të dashur miq të Partisë Demokratike. Ndaj Shqipërisë i duhet një Parti e fuqishme Demokratike që vepron sipas parimeve të shtetit ligjor, lufton bindshëm kundër korrupsionit dhe u shërben qytetarëve.
Së treti, ky Kuvend Kombëtar është një takim jashtëzakonisht i rëndësishëm për bashkëpunimin e ardhshëm me partnerët tuaj të CDU-së në Gjermani. Ne, CDU-ja kemi nevojë për një parti të fuqishme dhe partnere siç e përshkrova më lart dhe lipset nevoja për një Parti Demokratike të fuqishme në Kuvend. Mosmarrëveshja brenda partisë tuaj e ka penguar shumë bashkëpunimin tonë. Shpresoj që ky Kuvend Kombëtar të japë një sinjal për një dinamikë të re bashkëpunimi mes nesh. Ky Kuvend Kombëtar duhet të japë mesazhin që Partia Demokratike, së pari modernizohet në programin e saj si një forcë europiane. Së dyti, hapet dhe bëhet tërheqëse për forca dhe sinergji të tjera në shoqërinë shqiptare. Së treti, lejon që këto forca të ndihmojnë në formësimin dhe forcimin e asaj që përbën vullnetin për të zhvilluar më tej partinë.
Ju uroj ju i dashur Lulzim Basha dhe të gjithë bashkëpunëtorëve tuaj shumë suksese në këtë projekt të madh e të vështirë, por të domosdoshëm. Kudo që ne si CDU mund t’ju ofrojmë mbështetje, na njoftoni. Shqipëria ka një potencial të madh për shkak të popullit të saj. Në duam që Shqipëria më në fund të jetë në gjendje të përfitojë nga mundësitë e shtëpisë sonë të përbashkët europiane. Dhe pikërisht për këtë na duhet një Parti Demokratike e fuqishme dhe e reformuar”!
/ Newszone
