Basir Çollaku u paraqit sot në SPAK, jo si gazetar, por si kandidat për deputet i Partisë Demokratike në qarkun e Dibrës. Ai dorëzoi një kallëzim penal lidhur me dyshimet për krime elektorale në zonën e Matit, ku sipas tij, të përfshirë janë kundërshtari i tij politik Agron Malaj dhe persona të tjerë.
Pas dëshmisë së dhënë, Çollaku u shpreh se situata është alarmante dhe kërkoi ndërhyrje urgjente për të frenuar manipulimet para datës 11 maj. Ai theksoi se nuk mjaftojnë statistikat boshe, por duhen veprime konkrete.
“Po abuzohet rëndë me fondet publike. Rrugë dhe pasuri shtetërore po përdoren si mjet për të siguruar vota. Kemi dorëzuar informacione për zyrtarë që po japin para dhe punësime në këmbim të mbështetjes elektorale. Kam sjellë emra dhe numra kontakti të atyre që janë të përfshirë në këtë rrjet të blerjes së votave dhe shpërndarjes së zarfeve. Në këtë skemë janë përfshirë edhe persona të njohur të botës së krimit. Fuoristradat e zeza dhe njerëzit me precedentë të rrezikshëm lëvizin lirshëm nëpër qark,” deklaroi ai për mediat.
