TIRANË– Ambasada Amerikane është bërë këtë të premte pjesë e gjyqit të Partisë Demokratike. Dy persona, njëra prej tyre përkthyesja zyrtare e ambasadës, ndërsa tjetrës nuk i dihet ende roli, janë fotografuar në oborrin e Gjykatës së Apelit. Ndërkohë që brenda në sallë janë futur përfaqësuesit ligjorë të dy grupimeve brenda PD-së dhe trupa gjykuese, ndërsa në Gjykatën e Apelit janë vendosur masa të shumta sigurie.
Gjykata e Apelit pritet të japë vendimin përfundimtar për vulën e Partisë Demokratike këtë të premte, ku seanca ka nisur në orën 11:00. Vendimi i gjyqtarit Agron Zhukri që i dha vulën e selinë blu kryedemokratit Sali Berisha do të shqyrtohet nga trupi gjykues i përbërë nga Relatore Gjyqtare Elona Mihali, anëtar Irida Kacerja dhe Astrit Kalaja. Ky vendim do të përcaktojë dhe grupin e PD-së që do të regjistrohet në zgjedhjet lokale të 14 majit.
