Xhud Bellingam është kthyer në liderin e ri të Real Madrid dhe kushdo që mendonte se marilenët do të vuanin largimin e Karim Benzema, që tani kanë ndërruar mendje.
Anglezi, ashtu si në tre takimet e para të madrilenëve në kampionat, ka vendosur edhe sot fatin e ndeshjes duke i dhënë fitoren e katërt ekipit të Ançelotit në këtë start perfekt të edicionit.
Në ndeshjen ndaj Getafes në “Santiago Bernabeu”, gjërat nuk nisën mirë për Realin i cili pësoi gol nga Majoral që në minutën e 11.
Por madrilenët morën kontrollin e plotë të sfidës dhe të udhëhequr nga anglezi i papërmbajtshëm tentuan në çdo mënyrë që të shënonin.
Hoselu barazoi rezultatin sapo filloi pjesa e dytë për Realin, ndërsa furia përballë portës mike vazhdoi, duke detyruar portierin Soria që të bënte pritje pas pritje për të shpëtuar katërkëndorin.
Por në minutën e 95-të më në fund Bellingam ia doli të dërgonte topin në rrjetë, duke shënuar golin e tij të pestë personal në këtë start të La Liga dhe duke mbajtur Realin të vetëm në kreun e renditjes.
