RUMANI– Dy shqiptarë janë mes tetë personave të vënë në pranga gjatë një aksioni policor në Bukuresht. Shqiptarët mësohet se ishin pjesë e një grupi kriminal që bashkëpunonte me shtetas rumunë për transportin dhe shpërndarjen e drogërave të forta.
Droga bëhet me dije se shpërndahej dhe shitej në qytete të Rumanisë, Italisë, Francës, Spanjës dhe Shqipërisë.
Ngarkesat prej 10-12 kg me kokainë dhe heroinë, fshiheshin në makina që dërgoheshin në servise jashtë vendit, për t’u modifikuar me vende të posaçme, për fshehjen e drogës.
Autoritetet kanë sekuestruar rreth 10 kilogram kokainë, gjysmë kilogram heroinë dhe një sasi rreth 400 eurosh të falsifikuara, po ashtu prokuroria ka kërkuar konfiskimin e 1 milionë euro që dyshohet se janë perfituar nga tregëtia e drogës, si dhe një makine të modifikuar.
Operacioni është zhvilluar nga Policia e Drejtorisë për Luftën kundër Krimit të Organizuar, Shërbimi Kundër Drogës, në bashkëpunim me policinë e Drejtorisë së Operacioneve Speciale dhe prokurorët e DIICOT në Rumani.
