Avokati Franc Nuri, thotë se drejtësia është në ngërç të madh dhe nën trysni politike referuar përballjes me drejtësinë të kryedemokratit Sali Berisha dhe kreut të Partisë së Lirisë Ilir Meta.
Lidhur me seancën e sotme për çështjen “Partizani” në GJKKO, ku do të vendoset nëse dosja në ngarkim të Sali Berishës dhe Jamarbër Malltezit do kalojë për gjykim, thotë se çështja i është përcjellë gjyqtares paraprake Fjorela Davidhi dhe se do të jetë gjykata e posaçme që do të shqyrtojë nëse akuzat paraprake qëndrojnë apo rrëzohen.
I ftuar në një studio televizive, tha se nëse pushohet çështja, akuzat nuk qëndrojnë, ndërsa nëse kthehet dosja për rigjykim, kjo do të thotë se këto akuza nuk qëndrojnë dhe SPAK është gabuar, duke shtuar se të dyja variantet janë në favor të zotit Berisha.
“Të gjitha hapësirat ligjore janë shfrytëzuar nga avokatët e Berishës.
Zoti Berisha është përballur që në fillim, strategjia që ai ka ndjekur ka qenë përballja, duke përdorur çdo mjet procedurial që ka në dispozicion.
Çështja patjetër që ka hyrë në fazën e gjykimit paraprak që është një fazë e ndërmjetme.
Ky është një udhëkryq nëse çështja do të vazhdojë më tej apo do të pushojë. Është dhe mundësia që çështja të pushojë dhe mbyllet që tani.
Por duke qenë çështje e trysnuar politikisht, drejtësia është në një ngërç të madh.
Gjasat që çështja të mbyllet kaq shpejt në këtë fazë, janë të pakta.
Parë dhe çfarë ka ndodhur me zotin Meta dhe çfarë ka ndodhur me liderët e opozitës gjithë kohës.”
Ndërsa për arrestimin e Ilir Metës, avokati Nuri thotë se secili ka prezumimin e pafajësisë, deri sa të dënohet me një vendim të formës së prerë dhe se kjo duhet të zbatohet për qytetarin e thjeshtë dhe për qytetarin që ka qenë kryeministër apo president.
“Nuk mundet që një ish-president, një ish-kryeministër, ish-deputet të trajtohet në mënyrë të tillë se nuk kemi të bëjmë me një ngjarje në flagrancë, se nuk kemi të bëjmë me një person të armatosur.
Lideri i partisë së dytë opozitare po shkonte në selinë e tij për një konferencë për shtyp.
Efektivët e policisë jo vetëm kapërcejnë ligjet, por janë në shpërdorim detyre.
Çdo person që rezulton në hetim, do ishte gjëja më normale të thirrej për të sqaruar pozitën e tij, jo vetëm biznesmenët, politikanët, por edhe ministra dhe zyrtarë të tjerë.
Edhe kryeministri vetë është gjëja më normale që të paraqitet vetë dhe të japë llogari. Por këtu kemi një standard të dyfishtë.
Se nëse zoti Rama përmendet në disa dosje, por nuk shohim që me veprime të jetë thirrur kryeministri për tu pyetur.
Jo vetëm që nuk hetohen çështjet deri në fund, por SPAK nuk guxon që t’i përmendë emrin, jo më të thirret kryeministri në detyrë.
Pavarësia dhe fuqia duhet treguar ndaj atij që është i pushtetshëm sot, se pas 15 vitesh është tjetër punë.”
