Ish-kryeministri Sali Berisha ka deklaruar se do të marrë pjesë në takimin e thirrur nga Gazment Bardhi.
Një ditë më parë, Bardhi ftoi deputetët e PD në një tryezë të përbashkët te hotel Tirana, në nisje të sesionit të ri parlamentar, për të përcaktuar edhe objektivat e aksionit opozitar.
Teksa linte sallën e seancave plenare të Kuvendit të Shqipërisë, Berisha deklaroi para gazetarëve se ftesa e Bardhit është një hap pozitiv dhe ai bashkë me deputetët që e mbështesin, do të marrin pjesë.
“Theksova edhe në parlament, theksoj përsëri se ky parlament është i ngritur mbi krimin, drogën, është parlamenti i vetëm në Europë në të cilin vjedhja, krimi, droga shndërrohen në votë dhe vota shndërrohet në krim. Është institucion i fatkeqësisë kombëtare, është institucion që të vetmin vendim që ka marrë, ka dyfishuar rrogat e tij, është institucion i cili ka kaluar me dhjetëra vendime të lotuara nga krimi dhe grupet kriminale, është institucion i cili ka bllokuar të gjitha nismat me rëndësi kombëtare. Nuk ka lejuar rezolutën për dënimin e gjenocidit serb në Kosovë dhe trojet shqiptare.
Është institucion i cili me qëndrimet e tij, jo që nuk i shërben integrimit, por i shërben dezintegrimit të Shqipërisë në BE dhe e lë në vend numëro. Është institucion i cili siç e dëgjuat përpiqet të përligjë gjithçka antikushtetuese, antiligjore të qeverisë dhe të mbulojë krimet e saj”, tha Berisha.
Pyetje: Do të merrni pjesë në tryezë nesër?
Sali Berisha: Po do të marrim pjesë. Ne shkojmë aty dhe do të marrim pjesë. Edhe ftesën e konsiderojmë hap pozitiv dhe ne do të marrim pjesë.
Pyetje: Për negociata apo bashkim?
Sali Berisha: Do t’i mësoni që të gjitha në kohën e duhur, por ne i përgjigjemi pozitivisht ftesës.
/ Newszone
