TIRANË– Në fund të fjalës së tij para protestuesve në bulevardin ‘Dëshmorët e Kombit’ Berisha foli edhe për autorin që e goditi me grusht. Berisha i bëri thirrje policisë të lirojë autorin, duke e quajtur atë fatkeq. Sipas Berisha autori i vërtetë është i ulur në Samit, duke reaguar me akuza të ashpra ndaj kryeministrit Edi Rama.
“Ti themi policisë liroje fatkeqin. Liroje sepse është një mjeran, ka shitur veten,. Përpiqen sot ta lidhin…Ka vetëm një autor, ky është Edi Rama. Mos shpërndani dokrra dhe përralla sepse autori i vërtetë është i ulur në Samit”, tha Berisha.
Kryetari i Partisë Demokratike Sali Berisha u godit me grusht në fytyrë nga 31-vjeçari Gentian Shehu gjatë kohës që po marshonte nga selia e PD drejt bulevardit ‘Dëshmorët e Kombit’ ku do bashkohej me protestuesit. Shehu ka ardhur në mënyrë të rrufeshme nga turma dhe goditi në fytyrë Berishën. Në këtë moment kreu i PD ka rënë në tokë ndërsa ai është neutralizuar nga trupërohjat.
