TIRANË– Kryetari i Partisë Demokratike Sali Berisha i është përgjigjur deklaratës së ambasadores Kim, e cila e cilësoi të gabuar përfshirjen e tij në fushatë.
Përmes një postimi në rrjetet sociale kreu i PD e quan ‘guvernatore’ ambasadoren dhe shton se deklarata e saj ishte një shërbim i fundit ndaj kryeministrit Edi Rama, para përfundimit të mandatit të saj.
Në fund Berisha i ka bërë thirrje FBI-së dhe Kongresit të SHBA-ve që të hetojnë aferat e Kim dhe pronat e saj në Shqipëri.
Sali Berisha: Përgjigje zj. Yuri Kim. Të dashur miq, Guvernatorja Yuri Kim në përpjekje për një shërbim të fundit Edi Ramës, foli sot njëlloj sikur të fliste McGonigal me fustan. Por me dekleratën e saj për zjarre dhe zjarrëvënës në të vërtetë ajo përpiqet të fsheh aferat e veta korruptive të denoncuara publikisht, por edhe afera të tjera. Ftoj inspektorin e përgjithshëm të Departamentit të Shtetit, FBI dhe Kongresin e SHBA të hetojë aferat korruptive të guvernatores Kim përfshirë këtu pronat e saj në Shqipëri. Partia Demokratike sikundër deri sot është e gatshme të jap kontributin e saj për këtë transparencë. Partia Demokratike shton se kandidatët e saj nuk janë as të barit as të zjarrit, por janë kandidatët e votës së lirë. Ajo fton çdo shqiptar të marrë ndryshimin në duart e veta për të shpëtuar vendin nga një e keqe që po zgjat më shumë se një dekadë! Bashkë Fitojmë!
