TIRANË– Kryetari i Partisë Demokratike Sali Berisha nuk i ka kursyer ironitë ndaj kryeministrit Edi Rama teksa ka ‘paralajmëruar’ liderët europianë që të kenë kujdes kur t’i japin dorën kreut të qeverisë dhe të kjontrollojnë xhepat. Në një deklaratë nga selia blu lideri demokrat tha se Edi Rama është kryehajduti i vendit dhe që sipas tij është detyrë e shqiptarëve që ta largojnë nga qeverisja pasi liderët europianë që do të vijnë në Tiranë ditën e nesërme në kuadër të samitit BE-Ballkani Perëndimor nuk e bëjnë dot këtë.
Sali Berisha: Unë e di se ata që mblidhen nesër, nuk mund të na shpëtojnë nga vjedhjet e fondeve publike dhe pasurive publike, por të paktën duhet ta dinë që kur t’i japin dorën atij, të kontrollojnë xhepat. Ai është në fakt kryehajduti i shqiptarëve, i të gjitha kohërave. Unë e di që askush nuk do të vijë të na çlirojë ne nga narkoshteti, ne dhe vetëm ne do çlirohemi prej tij, por jetike është t’u dëshmojmë se njeriu që qëndron në tavolinë në emër të shqiptarëve, është një Noriegë me atlete të kuqe Adidas.
