TIRANË– Kryetari i Partisë Demokratike Sali Berisha u tregua i ashpër në reagimin e tij ndaj ambasadores amerikane Yuri Kim, e cila është në fund të mandatit të saj diplomatik në vendin tonë. Berisha e akuzoi ambasadoren se ka shkelur sovranitetin e vendit dhe ka ofenduar demokratët dhe ata që mbështesin lidershipin e tij. Në një konferenmcë me gazetarët në selinë blu Berisha tha se me perotesta paqësore qytetarët do të kërkonin largimin e saj nga vendi ynë.
Sali Berisha: Kërcënimet, ofendimet e saj ndaj demokratëve, se do hanë bar nëse mbështesin Sali Berishën, dhunimi flagrant i sovranitetit të një vendi duke kërkuar mosfutjen e Sali Berishës në Kuvend, pasi kishte marrë mandatin nga sovrani, thirrjet ndaj elektoratit se kë duhet dhe kë nuk duhet të votojë, kundërshtimi i çdo konvente me kërcënimet ndaj gjyqësorit, këto janë akte të shëmtuara të saj, për të cilat garantoj se po të mos ishin dy faktorë, ndjenjat dhe admirimi i imi dhe mbështetësve të mi ndaj SHBA, dhe agresioni barbar rus ndaj Ukrainës, zonja në fjalë nuk do të ishte toleruar kurrë. Me protesta paqësore, paqësisht do të ishte kërkuar largimi i saj sa më shpejt nga Shqipëria.
