Mijëra qytetarë shkodranë janë mbledhur në sheshin qendror të qytetit për të marrë pjesë në takimin përmbyllës të fushatës elektorale të Partisë Demokratike, në kuadër të zgjedhjeve të 11 majit. Atmosfera ishte e mbushur me entuziazëm, flamuj, brohoritje dhe pankarta në mbështetje të opozitës, ndërsa në skenë u ngjit lideri historik i PD-së, Sali Berisha, i shoqëruar nga drejtues lokalë dhe kandidatë të kësaj force politike.
Qytetarët e qarkut Shkodër kanë shprehur hapur përkrahjen për opozitën, duke dënuar me ton të ashpër keqqeverisjen 12-vjeçare të Edi Ramës dhe duke kërkuar një ndryshim të thellë politik dhe ekonomik në vend.
“Shkodra ka qenë gjithmonë bastion i lirisë dhe demokracisë”, deklaroi Berisha, duke theksuar se 11 maji është dita e shpresës dhe ringritjes për të gjithë shqiptarët.
Takimi kulmoi me thirrje për pjesëmarrje masive në votim dhe mesazhe të forta kundër korrupsionit, varfërisë dhe shtypjes së lirisë së fjalës.
