Sali Berisha ka reaguar ashpër ndaj kryeministrit Edi Rama, duke deklaruar se “në Europë nuk shkohet me vota të vjedhura, zgjedhje farsë dhe narko-shtet”. Ky mesazh u publikua pak orë para protestës së paralajmëruar nga Partia Demokratike, që do të mbahet sot në orën 17:00.
Berisha e cilësoi procesin zgjedhor të 11 majit si më të manipuluarin në historinë e vendit, duke akuzuar qeverinë për përdorim të administratës publike në funksion të fushatës, falje gjobash, shpërndarje tenderash dhe investimesh të programuara posaçërisht për të ndikuar votuesit.
Ai theksoi gjithashtu se gjatë kësaj periudhe janë dhënë 138 licenca për mbjellje kanabisi, çka sipas tij është një tjetër dëshmi e lidhjeve të qeverisë me krimin dhe e shndërrimit të shtetit në një narko-sistem.
Berisha kërkoi mbështetjen e faktorit ndërkombëtar për garantimin e zgjedhjeve të lira dhe të ndershme në Shqipëri.
