TIRANË– Kryetari i Partisë Demokratike Sali Berisha hodhi akuza të forta ndaj kreut të qeverisë Edi Rama. Gjatë konferencës së përjavshme me gazetarët kryedemokrati tha se kryeministri po ndërhyn në SPAK që të përzgjedhë Edvin Kondilin në krye të institucionit. Më tej lideri demokrat u shpreh se eksponentë të krimit të orhganizuar darkojnë me deputetë dhe eksponentë të lartë të qeverisë.
Sali Berisha: Vijmë te tragjikomedia e paimagjinueshme që po ndodh me atë që duhej të ishte institucioni i shpresës së shqiptarëve, me SPAK-un. Kurrë në histori, as në romanet e Markezit, nuk mund të gjesh një betejë të turpshme midis një kryeministri dhe një ambasadori që me ligj nuk kanë asnjë lidhje me emërimin e kreut të SPAK-ut. Asnjë lidhje nuk kanë. Ç’punë ka një kryeministër se kush emërohet në krye të SPAK-ut? Ka vetëm dosjen e tij, sepse dosja e djegësave është dosje e një organizate kriminale, në të cilën ka firmosur Edi Rama. Prandaj ai bën këtë figurë të turpshme, diskrediton totalisht nj organ, e asgjëson, në një kohë me ligj, kryetari i SPAK ka vetëm një funksion, të ndajë dosjet. Nuk ndërhyn dot në hetim te prokurori. Me Kushtetutë. Beteja është surrealiste. Nuk ndodh kurrë. Bota e krimit darkon dhe drekon me eksponentë të krimit të organizuar që është në parlament. Ky është asgjësimi si kurrë më parë i sistemit të drejtësisë. Kurrë ndonjëherë nuk ka ndodhur. Urdhëroni tani, ish-drejtori i SHISH që e ka emëruar vetë, ia mbyll derën si bandit. Urdhëro shteti i tij. Tani do organin e akuzës, o Kondili o nuk ka, thotë. Duke diskredituar totalisht këtë institucion, duke e asgjësuar këtë institucion. në e kam thënë me kohë se ky është SKAP-i i partisë. Se ky nuk ka një dosje në interes të qytetarëve. Por të thërrasësh Aldo Bumçin për një falsifikim të bërë, të faktuar që është falsifikim, vetëm se gjoja po heton Sali Berishën dhe dajlin e tij. Ky është nj turp kombëtar. Për atë falsifikim, Aldo Bumçi e ka çuar në prokurori. Ai ishte një manipulim me urdhër për të implikuar mua dhe djalin tim. Dihet kush e ka bërë atë falsifikim, ka dëshmitarë kush e ka bërë. Bumçi e çoi në atë kohë në prokurori. Unë them jo, se e mora vesh kush ishte. Këta e marrin tani për së dyti. E kuptoni se me cfarë merret SPAK-u? Si me qenë repart i turpshëm i Edi Ramës dhe Taulant Ballës. Por ato janë paratë tuaja, janë paratë e taksapaguesve. Urdhëroni se me çfarë merren. Prandaj shqiptarët e përçmojnë dhe e përbuzin masivisht SPAK-unë. Ka pasur një task-forcë në vitin 2007, me një prokuror dhe punonjës të policisë. Ata shqyrtonin rastet e korrupsionit. Sa ka dënuar gjykata nga kjo task-forcë në vitin e parë? 343 zyrtarë. Të të gjitha niveleve. Sa ka dënuar SPAK në vitin e parë të jetës së tij? Gjithsej 63. 600 përqind më shumë, po t’i marrësh së bashku vitin e parë dhe të dytë. Sa marrin ata, e keni parasysh, një prej tyre merr të gjitha rrogat tuaja së bashku. Merr jo për t’i shërbyer qytetarëve, por për t’i shërbyer hajdutëve.
