TIRANË– Kryetari i Partisë Demokratike Sali Berisha e cilësoi nisjen e punimeve për ndërtimin e Teatrit të ri Kombëtar si një dhunim të vendimit të Gjykatës Kushtetuese që u shpreh kundër vijimit të procedurave për ndërtim në këtë truall duke ia kthyer qeverisë në pronësi. Ndërsa sa i përket prishjes së pallatit në rrugën “Myslym Keta” kreu i selisë blu tha se opozita nuk e pranon këtë vendim dhe se sipas tij banorët u nxorrën në mes të rrugës që aty të ndërtohet një kompleks pallatesh.
Sali Berisha: Ajo që u zhvillua në rrugën “Myslym Keta” ngjarje e rënduar në mënyrë çnjerëzore, pasi zgjodhën pragun e festave për të përdorur forcën dhe buldozierët. Banorët kishin mirëkuptim por kërkonin siguritë që kërkon kushdo për banesën e tij. Sa do marrin, ku do e marrin dhe kur? U trajtuan si kavie, jo qytetarë. Nga një kryebashkiak që mendon nga mëngjesi në darkë si të vjedhë fondet e qytetarëve të Tiranës. Nga ky akt kalohet në dhunimin e vendimit të GJK. Kjo është një sfidë e hapur, jo vetëm për aleancën por për çdo qytetar dhe opozitën në radhë të parë. I thuhet se si pushtet nuk njohim kushtetutë, norma dhe standarte. GJK ndalon me vendim procedimin e mëtejshëm në atë truall. Ia kthen atë qeverisë, por këtu është vendi i vetëm ku vendimet e GJK rrëzohen me vendimet e banditëve qeveritarë. Ndaj unë paralajmëroj Erion Velinë, se me këtë akt po nxit me të gjithë forcën përplasjen me qytetarët. Ai është një kukull e Edi Ramës. Do e paguaj vetë këtë akt. Paralajmëroj ndërtuesin, i them mos u bëj mashë e qeverisë dhe Veliajt. Hiq dorë nga zbatimi i projektit. Opozita nuk do e pranojë kurrë, do bëjë gjithçka për zbatimin e vendimit të GJK.
