TIRANË– Kryetari i Partisë Demokratike Sali Berisha ka akuzuar sëerish ditën e sotme ambasadoren e Shteteve të Bashkuara të Amerikës në Tiranë Yuri Kim si të përfshirë në skandalin e ish-agjentit të FBI-së Charles McGonigal. Sipas tij diplomatja amerikane ka shkelmuar Kushtetuten e vendit dhe ka thërritur një nga një deputetët demokratë duke i kërcënuar për qëndrimin e tyre ndaj lidershipit të PD. Ai e cilësoi zonjën Kim si një McGonigal me fustan.
Sali Berisha: E them këtu se Yuri Kim u soll si McGonigal me fustan. Sepse kam bindjen absolute që ajo shkelmoi Kushtetutën e vendit të saj dhe të vendit tim. Ajo shkelmoi Konventën e Vjenës dhe kurrë s’mund të ketë qenë dhe s’mund të jetë përfaqësim i vlerave, të Amerikës së ligjeve, të shteteve të bashkuara që udhëheqin me moralin, frymën e tyre. Unë e di që ajo do ta transmetojë këtë gjë si qëndrim antiamerikan, por ka një besim të palëkundur tek ai vend, që vërtet ka një McGonigal, por e arreston atë McGonigal. Vend të dytë si ai nuk ka. Sulmet ndaj Opozitës, të McGonigalit me futan, krahasuar me McGonigalin me kollare. Si mekanizëm. njëri u mor me manipulim, por s’është marrë me më pak manipulime zonja Kim. Ka thirrur njëri pas tjetrit për t’i manipuluar të gjithë deputetët e Partisë Demokratike, duke drejtuar mesazhe kërcënuese në drejtim të Berishës, duke përdorur citate të Enver Hoxhës.
