TIRANË– Kryetari i Partisë Demokratike Sali Berisha ka marrë sërish fjalën para protestuesve menjëherë pasi Kuvendi vetëm me votat e mazhorancës vendosi datën 2 mars si datë kur do të mbahet interpelanca e opozitës me kryeministrin Edi Rama në lidhjen me skandalkin e arrestimit të ish-agjentit të FBI-së Charles McGonigal. Ai paralajmëroi kreun e qeverisë se nëse ajo seancë nuk do të mbahej atëherë protestuesit do i shkonin në shtëpinë e tij në Surrel.
Sali Berisha: Tani, le të betohemi këtu, në emër të të gjithë atyre që përfaqësojmë, po nuk u bë mocioni me debat në parlament, do bëhet në Surrel. Paqësor, urtë e butë!
Por simboli, shpella e të keqes është Surreli. Ai nuk pranon të vijë këtu, ndaj ne do shkojmë aty ku struket ai. Paqësisht do ia numërojmë të gjitha këto të mocionit. Surreli do jetë objekt i revolucionit paqësor. Shkojmë aty karshi dhe i themi: kemi 13 pyetje o sulltan. Revolucioni nuk ndalet, por të jeni të sigurt që do fitojmë!
