TIRANË– Kryetari i Partisë Demokratike Sali Berishja ka akuzuar kryeministrin Edi Rama se ka hequr nenin që ndalonte qarkullimin e ilaçeve të pamiratuara nga entet amerikane dhe ato europiane. Gjatë fjalës së tij me anëtarë të Departamentit të Shëndetësisë në selinë blu Berisha tha se në Shqipëri hyjnë ilaçe të cilat nuk janë miratuar nga entet amerikane apo europiane për t’u përdorur duke i bërë ato të rrezikshme.
Sali Berisha: Sistemi ynë ka humbur atë që quhet rajonizim dhe që është i domosdoshëm për plotësimin e kërkesave të këtij sistemi nga qytetarët. Shëndetësia ka pasojat më të rënda, ka pasojë jetën. E vërteta është se në tërësi, listën e ilaçeve sot e bëjnë kompanitë e prodhimit të cilat zhdukën disa standarte të domosdoshme ligjore për Shqipërinë. Ne kishim një ligj sipas të cilit në Shqipëri nuk mund të qarkullonin ilaçe të pamiratuara nga enti amerikan apo europian i përdorimit të tyre. Ndryshimi i parë që bëri Rama ishte rrëzimi i këtij neni. Ky nen ishte një mbrojtje që u bëhej të sëmurëve tonë për të mos spekuluar me ilaçe të prodhimit ballkanas. U hoq ky nen në mënyrë të diktuar nga Enti Farmaceutik i Beogradit që kishte përfaqësuese Vilma Nushin. Sot shqiptarët nuk dinë se çfarë blejnë në farmaci. Recetat që kolegët tuaj u lëshojnë, nuk kanë asnjë garanci se ilaçet të cilat blihen nga të sëmurët, do japin efekt.
