TIRANË– Kryetari i Partisë Demokratike Sali Berisha ka kërkuar këtë të enjte që Parlamenti të mbajë një minut heshtje në nder të atij që ai e quan “martir i lirisë”, muxhahedini, i cili vdiq gjatë aksionit të Policisë në Kampin e MEK në Manzë. Kësaj thirrje iu përgjigjen vetëm deputetët e opozitës. Sipas Berishës aksioni i Policisë ishte i jashtëligjshëm si dhe dënoi dhunën e e pretenduar të ushtruar ndaj muxhahedinëve në kampin Ashraf 3. Po ashtu lideri demokrat kërkoi dorëheqejne ministrit të Brendshëm Bledi Çuçi.
Sali Berisha: Jam këtu për të deklaruar sot se në këtë moment ndjehem më shumë se kurrë njëri prej tyre, ndjehem një muxhahedin, luftëtar i lirisë. U shpreh atyre ndjenjat e mia më të sinqerta të mbështetjes dhe simpatisë. Ndjehem sot muxhahedin sepse qeveria amorale e këtij vendi vrau në bukë të vet, në strehë të vet, një luftëtar lirie. Ndjehem sot muxhahedin më shumë se kurrë, sepse aktakuza e djeshme që lexuat, është historia më e turpshme për një vend. Ajo ishte e shkruar në Teheran. Aktakuza bazohej e tëra në shpifje, trillime të shërbimeve të ajatollahëve ndaj luftëtarëve të lirisë. Aktakuza përmbante elementë të poshtërimit ekstrem të Shqipërisë dhe shqiptarëve, sikur nuk është një vend anëtar i NATO-s, por sikur është një vasal i Iranit. Të marrësh ato për bazë, për të ushtruar një reprezalje më të turpshme në historinë e këtij vendi. Ndaj kërkoj largimin e menjëhershëm të ministrit të Brendshëm. Kërkoj të mbajmë një minutë heshtje për martirin e lirisë që ra për t’u bërë i pavdekshëm. Ju ftoj të mbajmë një minutë heshtje!
