TIRANË– Kryetari i Partisë Demokratike u ka bërë thirrje këtë të hënë të gjithë emigrantëve që të kthehen në vendin e tyre më 14 maj dhe të votojnë kundër qeverisë nëse duan ndryshimin e vendit. Deklaratën kreu i PD e bëri gjatë një bashkëbisedimi me qytetarët në Facebook. Ai tha se emigrantët duhet të bëjnë gjithçka për të ardhur dhe votuar pavërsisht se sipas tij kryeministri Edi Rama po bën gjithçka për ti penguar.
Sali Berisha: Normalisht çdo emigrant kudo që ndodhet, më 14 maj duhet të votonte aty ku gjendet. Sot teknologjia e bën të mundur votimin në kohë reale kudo që ndodhet shqiptari. Por pengesa e vetme për këtë është Edi Rama, i cili nuk pranon dhe nuk do të pranojë që në këto zgjedhje të votojë emigracioni. Por, këto janë zgjedhjet e jetës sonë, në kuptimin e asaj që ne ftohemi pas 32 vitesh te kutitë e votimit për të rivendosur pluralizmin dhe përmbysur monizmin. Në këtë kontekst, në këtë betejë, angazhimi i emigracionit, qoftë duke qartësuar rolin jetik që ka pluralizmi për shoqërinë shqiptare, qoftë duke marrë ato kursime që kanë për të ardhur për ët votuar, është i një rëndësie shumë të madhe. Me këtë rast i ftoj të gjithë emigrantët për të qenë më 14 maj në Shqipëri dhe për të votuar për pluralizmin. Sikundër i ftoj ata që nuk kanë mundësi, të bëjnë gjithçka me telefonata, jo vetëm me familjarët, por edhe më të afërmit e tyre, t’u kujtojnë se pse nuk ndodhen në Shqipëri. T’i ftojnë të votojnë kandidatët e primareve, të votojnë ndryshimin.
