TIRANË– Kryetari i Partisë Demokratike Sali Berisha deklaroi sot se rikthimi i tij i tretë në politikë do të jetë më i suksesshmi. Gjatë një komunikimi live në Facebook me qytetarët kreu i PD e krahasoi rikthimin e tij në krye të Shqipërisë me atë të Steve Jobs. Berisha tha se ai u rikthye dhe i bëri botës iPod, iPad dhe iPhone ndërsa ai do të sjellë një qeverisje më të mirë dhe zhvillim për vendin.
Sali Berisha: Rikthimi i tretë i Sali Berishës në qeverisje do jetë më i suksesshmi. Do e krahasoj edhe njëherë me Steve Jobs, i cili pasi e larguan nga ndërmarrja e tij, u rikthye dhe i bëri botës iPod, iPad dhe iPhone. Një rikthim i tretë do ketë momente kulmore, gjithçka në interes të shqiptarëve. Ne arritëm me ato reforma ekonomike që ju thoni, të kalojmë nga grupi i vendeve me të ardhura të ulëta, në grupin e vendeve me të ardhura të mesme të larta. Arritëm të jemi njerëzit më të paguar në Ballkan, madje më të paguar se bullgarët dhe rumunët. Objektivi ynë ishte të kapnim sllovenët se ata janë me rroga më afër me vendet e 15-shes së BE. Ku e bazoja unë këtë objektiv? Asnjë vend në Ballkan, as Sllovenia, as Serbia, nuk ka pasuri përrallore të Shqipërisë. Në këtë kontekst, është në detyrën e një qeverie që këto pasuri t’i kthejë një mirësi, në mirëqenie, në rroga, në pensione, begati dhe progres të qytetarëve. Kështu që unë mbetem i sigurt në realizimin e këtyre objektivave
