BULQIZË– Kryetari i Partisë Demokratike Sali Berisha ka “sulmuar” këtë të premte nga Bulqiza ku po merr pjesë në 32-vjetorin e themelimit të PD në këtë qytet kryeministrin Edi Rama dhe ministret e kabinetit të tij. Në “shënjestren” e kryedemokratit ishte ministrja e Infrastrukturës dhe Energjisë Belinda Balluku, e cila prej muajsh është caktuar nga Rama drejtuese politike e qarkut Dibër. Po ashtu ai ka akuzuar dhe ministren e Jashtnme Olta Xhaçka, e cila më herët ka mbajtur detyrën e drejtueses politike në Dibër. Berisha tha se Xhaçka përdorte helikopterin e ushtrisë për udhëtime partie. Ndërsa për kreun e ekzekutivit u shpreh se ka ngrënë darka 10 mijë dollarëshe me armikun e SHBA-së duke iu referuar ish-agjentit të arrestuar të FBI-së Charles McGonigal.
Sali Berisha: Edi Rama nga mëngjesi deri në darkë me balluket dhe stërballuket nuk ka asnjë synim, vetëm të ju mashtrojë ju në mënyrë që të vazhdojnë të vjedhin. Nëse i hidhni sytë sot Shqipërisë, u them unë ju pasuria më e madhe e shqiptarëve përsëri ndodhet në Bulqizë edhe pse janë nxjerrë miliona e miliona ton krom. Ndodhet në Bulqizë, në Martanesh. Hidhni sytë këto vite, sikur dilni nga një luftë. Rrugë të shkatërruara, qendra shëndetësore, shkolla të mbyllura. Koha ka ndaluar për ju njerëz punëtorë, të mençur me intelektualë të fuqishëm, me potenciale të mëdha, sepse edhe rentën e hoqi. Sepse oligarkët i paguan atij ryshfetin, ua hoqi edhe rentën që duhet ta përfitonit me ligj për qytetin tuaj, për infrastrukturën tuaj. Nuk vazhdohet me këta. Këta nuk kanë shpirt, ndjenja. Po si mund të mendojnë për fëmijët në Ostren, apo në ndonjë fshat tjetër, ai që ulet dhe drekon me armikun, me armikun e SHBA-së. 10 mijë dollarë darkën. Po si mund të mendojë për fëmijët e Bulqizës, ballukja që këput biftekun 1 mijë euro. Por një zyrtar kurrë nuk mund të lëshohet në luks dhe shfrenim. Sepse një zyrtar e din nga i merr ai të ardhurat. Nëse nuk vjedh, 10 mijë euro është rroga e tetë muajve e tij. 1 mijë euro është pothuajse rroga mujore e saj. Por këta vjedhin, i kanë paratë pa numër, këta nuk pyesin. Ka ardhur koha të ua presim biletën.
