Nga Edon KUQI
Vijojnë përplasjet për vulën në Partinë Demokratike zyrtare në drejtim të së cilës prej datës 29 korrik pritet të vijë Lulzim Basha. Këtë të mërkurë Komisioni i Apelimit, Integritetit dhe Etikës do të mblidhet në orën 19:00 për të shqyrtuar kërkesën e Kryesisë së Partisë Demokratike, që kërkon shfuqizimin e vendimit të Gazment Bardhit për mbledhjen online të Këshillit Kombëtar.
Mbledhje që pritet të deligjitimojë procesin për rizgjedhjen e Lulzim Bashës në krye të PD-së zyrtare. Drejtuesja e këtij Komisoni, deputetja Flutura Açka i ka kërkuar Bardhit që të jetë i pranishëm në seancë.
Nuk dihet nëse ky i fundit do të shkojë në “gjyqin” që pritet ti bëhet nga vetët. Situata në Partinë Demokratike zyrtare mbetet ende e paqartë. “Lufta” për vulën” duket se do të heqë “kokën” e Gazment Bardhit, i cili me veprimet e fundit duke se ka dalë nga “rreshti”: i Lulzim Bashës dhe nuk është dakort me zgjedhjen e këtij të fundit në krye të partisë pas dorëheqjes që erdhi pas humbjes së zgjedhjeve të 6 majit të vitit të shkuar.
Jo vetëm Gazment Bardhi por dhe deputetë të tjerë që njihen si “besnikë” të Lulzim Bashës duket se me rikthimin e këtij të fundit në politikë dhe rizgjedhjen e tij në krye të partisë e kanë parë si një hap të gabuar që nuk i shërben bashkimit të demokratëve që prej 2 vitesh tashmë janë të shpërndarë në “vulë” dhe në bazë. Saimir Korreshi, Lefter Gështenja apo Bledion Nallbati duket se nuk kanë më kthim pas sa i përket rikthimit të tyre në PD-në e Bashës por mbetet ende i paqartë orientimi i tyre.
Ndërkohë “fati” i Gazment Bardhit dhe rruga që ai do të ndjekë mbetet ende e pa qartë. zërat në koridoret e politikës shprehen se po negociohet për një pozicionim të tij në krah të PD-së të drejtuar nga Sali Berisha, por kjo nuk është e sigurt pasi vetë Bardhi të paktën publikisht e ka mohuar diçka të tillë. Po ashtu është ende herët për të folur për një distancim final mes Gazment Bardhit dhe Lulzim Bashës.
Korriku ishte i “nxehtë” jo vetëm për shkak të temperaturave të larta por dhe për aksionin opozitar në Kuvend dhe skandalet që shpërthyen në oborrin e qeverisë, por asnjë nga këto nuk mjaftuan që pushteti i kryeministrit Edi Rama të lëkundej, madje ky i fundit nuk u paraqit as në seancën e fundit plenare ku opozita që këtë të herë dukej e bashkuar dhe e unifikuar në qëndrime kërkonte me ngulm “kokën” e tij në sallë për të folur për aferën e inceneratorëve dhe përfshirjen e ish-zëvendëskryemnistrit Arben Ahmetaj tashmë në arrati në këtë aferë./Newszone
