TIRANË– Avokatja dhe pedagogia Enida Bozheku e ftuar në emisionin “Stay Tuned” me moderatoren Valbona Mhilli thotë se po rritet një brez që strukturën në mënyrën e të menduarit dhe të qenit të tyre e bazon mbi dhunën dhe se Tik Toku e promovon më shumë dhe e nxjerr si diçka pozitive.
“Heroi i kohës sot, është i dhunshëm, barbar, i rëndomtë, banal totalisht, disfunksional nga ana cerebrale. Sa më i paditur të jesh sa më pak logjikë të kesh, aq më shumë mbizotëron ku është instinkti yt për të vepruar. Këto vajza dhe djem, janë instinkt, janë emocional por të udhëhequr nga instinkti. Gëzimi i tyre është në dhimbje. Rinia jonë po shndërrohet në qasje sadiste, me prirje ndaj dhunës dhe të keqes. Diçka çalon me edukimin në familje, por dhe në shkolla padyshim, se ecin paralel. Por dhe në edukimin shoqëror, mediatik. Ne kemi një emision që aktualisht i ngre lavde bullizmit, dhunës verbale, poshtërimit të keqit. Shembull për të rinjtë është se brezi i ri e sheh kryesisht. Rinia nuk e dallon dot dhe idealizon shembullin më të keq”.
Po ashtu ajo deklaroi se familja shqiptare nuk e pranon kollaj që të çoj fëmijën te psikologu, madje shtoi se prindi thotë fëmija nuk ka asgjë dhe në këtë drejtim u shpreh se së pari duhet çuar prindi te psikologu. Bozheku deklaroi se mbi të gjitha femra shqiptare në karrierë paragjykohet, se u bë dhe si u bë.
“Femra shqiptare ka ecur shumë, është emancipuar, është zhvilluar dhe e ka lënë mashkullin pas. Nuk po e ndjek dot më hapin e femrës. Mentaliteti maskilist që ka mbetur mbas në kohë, për ta dëmtuar këtë femrën, fillon e etiketon dhe e gjuan me gurë. Por pema që është plotë gjuhet. Personat që divorcohen më shumë janë ata me arsim 9-vjeçar dhe të mesëm. Me arsim të lartë realisht janë më pak. Por dhe këta me shkollë të lartë që nuk e kanë përthithur arsimin, ndahen, se fillon ndjejnë konkurrencën. Vetëbesimi i ulët sjell dhunë. Një mashkull që ka vetëbesim, ka krenarinë që ta ketë atë gruan si vetja dhe jo inferiore, se me një grua inferiore nuk ka çfarë të diskutojë”.
