TIRANË -Policia e Shtetit në bashkëpunim me palën britanike kanë kthyer në vend këtë të premte 50 shqiptarë të cilët nuk përmbushnin dot kriteret për të qëndruar në Britaninë e Madhe.
Sipas njoftimit të bërë pala shqipare dhe ajo britanike kanë marrë të gjitha masat e nevojshme për verifikimet dhe vënien përpara përgjegjësive, sa i takon qytetarëve që nuk kanë respektuar detyrimet.
NJOFTIMI I POLICISË:
”Në zbatim të marrëveshjes së ripranimit, ndërmjet qeverisë së Republikës të Shqipërisë dhe qeverisë së Mbretërisë së Bashkuar, në fluturimet e organizuara janë riatdhesuar 50 shtetas shqiptarë të cilët nuk përmbushnin më kushtet për qëndrim në Mbretërinë e Bashkuar. Policia e Shtetit, në bashkëpunim me palën britanike, në kuadër të Task Forcës së përbashkët, ka marrë masa për verifikimet e nevojshme dhe për vënien përpara përgjegjësisë të shtetasve që nuk kanë respektuar detyrimet.
Policia e Shtetit është e vendosur për të bashkëpunuar me parterët për të parandaluar dhe ndëshkuar kalimin e paligjshëm të kufijve dhe apelon për të gjithë shtetasit shqiptarë që të zbatojnë legjislacionin në fuqi për rregullat e lëvizjes në BE dhe më gjerë.”
