Në edicionin e ‘ORA 16’ në SYRI TV, i moderuar nga Edvin Parruca, i ftuar ishte anëtari i kryesisë së Partisë Demokratike, Aldo Bumçi. Gjatë intervistës, Bumçi trajtoi tema të rëndësishme që lidhen me strategjinë e opozitës dhe sfidat me të cilat përballet qeveria aktuale. Ai nënvizoi rëndësinë e aksionit të mosbindjes civile si një mjet të fuqishëm të opozitës për të mobilizuar qytetarët në luftën kundër qeverisë së Edi Ramës.
Bumçi theksoi se protesta e fundit tregoi qartë që zemërimi i popullit ka arritur në një pikë kritike dhe se qeverisja aktuale nuk mund të tolerohet më nga qytetarët.
Më tej, Bumçi argumentoi se dalja masive në protestë është një tregues i gatishmërisë së qytetarëve për ndryshim dhe se kjo gjendje nuk lejon më kthim pas. Duke sugjeruar një zgjidhje, ai u shpreh se një qeveri teknike është e mundshme dhe se opozita, së bashku me qytetarët, nuk do të ndalet deri në arritjen e këtij qëllimi.
Kjo analizë e tij vjen në një kohë kritike për politikën shqiptare, ndërsa opozita po rrit presionin për ndryshime rrënjësore në mënyrën se si po drejtohet vendi.
‘PD do të përdorë të gjitha kanalet, çdo mjet që ka në dispozicion një opozitë, por e rëndësishme është që thelbi i aksionit tonë është mosbindja civile. Protesta e ditës së hënë tregoi shumë qartë se kemi arritur një pikë vlimi, ku qytetarët janë tashmë të paduruar për largimin e kësaj qeverie. Këtë e treguan me pjesëmarrjen e jashtëzakonshme në një protestë ku nuk u thirrën, si zakonisht, për të demonstruar apo për të dëgjuar fjalime, të cilat kanë vlerë dhe janë pjesë thelbësore e jetës politike, por për një protestë ndryshe. Mosbindja civile nënkuptonte një nivel më të lartë përplasjeje dhe aktesh, ndaj mund të pritej natyrshëm një pjesëmarrje më e ulët, pasi jo të gjithë kanë dëshirë të marrin pjesë në protesta që kërkojnë më tepër energji.
Njerëzit dolën, njerëzit erdhën në një pjesëmarrje të jashtëzakonshme, dhe ky është mesazhi i parë që duhet të mbahet shënim nga Edi Rama dhe të gjithë ata që e këshillojnë. Qytetarëve të këtij vendi u ka shkuar thika në palcë. Ata nuk durojnë dot më Edi Ramën dhe këtë qeverisje sikur të jetë një normalitet, dhe nuk mund të shkojmë në zgjedhje për një mandat tjetër katërvjeçar të Edi Ramës.
Dalja masive e qytetarëve në një protestë të veçantë tregoi që gjendja ka arritur në një pikë ku nuk ka më kthim pas. Shoqëria iu përgjigj thirrjes së Partisë Demokratike. Jo vetëm që iu përgjigj, por shoqëria është në mllef, në gatishmëri për revoltë, dhe janë përpara nesh.
Unë parashikoj që një zgjidhje e mundshme është të shkojmë drejt një qeverie teknike. Nuk mendoj se ka asnjë pengesë të pakalueshme për opozitën dhe qytetarët për të arritur në këtë rezultat.’- u shpreh Bumçi.
