TIRANË– Spartak Dobi, burri i pastrueses Rozeta Dobi, e cila bashkë me të birin Havier Dobin vodhi 120 mijë euro në shtëpinë e ish-zyrtares së lartë në Kryeministri Alda Klosi me lot në sy ka rrëfyer versionin e tij të historisë duke shfajsuar të birin nga krimi. Në një rrëfim për emisionin “Review” në Euronews Albania, Dobi shprehet se Manja i ka premtuar se djalin e tij Havier Dobi do të bëjnë çmos që ta lirojnë nga burgu.
Spartak Dobi: Sot kam qëndruar gjithë ditën me ministrin e drejtësisë. I kam treguar për ngjarjen e më tha do të bëjmë çmos që djalin ta lirojmë por gruan jo. I thashë gruan çojeni më tej Stambollit. Djali nuk ka faj, e ka mësuar e ëma. I kishim në rregull të gjithë gjërat. Djali shkonte punonte natën.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Kryeministri Alda Klosi. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale.
